தூத்துக்குடி சிவன் கோவிலில் நாளை தமிழ் புத்தாண்டு விழா : ஏற்பாடுகளை தீவிரம்

தூத்துக்குடியில் அமைந்துள்ள பிரசித்தி பெற்ற சிவன் கோவில் என்று அழைக்கப்படும் அருள்மிகு பாகம்பிரியாள் உடனுறை சங்கர ராமேஸ்வரர் திருக்கோயிலில், நாளை (14.04.2026, செவ்வாய்க்கிழமை) தமிழ் புத்தாண்டு மற்றும் சித்திரை விஷு விழா மிக விமரிசையாகக் கொண்டாடப்பட உள்ளது.

சித்திரை மாதப்பிறப்பை முன்னிட்டு, இக்கோயிலின் சுவாமி ஸ்ரீ ஆறுமுக நயினார் சன்னதியில் சித்திரை விஷு அன்னாபிஷேகம் நடைபெறுகிறது. இதற்காக அதிகாலை 4:00 மணிக்குத் திருக்கோயில் நடை திறக்கப்பட்டு, 4:30 மணிக்குத் திருவனந்தல் பூஜையுடன் வழிபாடுகள் தொடங்கும். அதிகாலை 5:00 மணிக்கு மூலஸ்தானத்தில் சுவாமி ஸ்ரீ ஆறுமுகப் பெருமானுக்குச் சிறப்பு அபிஷேகமும், காலை 6:00 மணிக்கு உருகு சட்ட சேவையும் நடைபெறும்.

அதனைத் தொடர்ந்து காலை 7:00 மணிக்குச் சுவாமி உற்சவ மண்டபத்திற்கு எழுந்தருளுவார். காலை 10:00 மணிக்கு ஸ்ரீ சண்முகர் அபிஷேக மண்டபத்தில் மகா அபிஷேகம் நடைபெறும். பிற்பகல் 2:30 மணிக்கு ஸ்ரீ ஆறுமுக அர்ச்சனையும் தீபாராதனையும் நடைபெறும். இரவு 8:00 மணிக்குத் தீபாராதனை முடிந்து, இரவு 10:00 மணிக்குச் சுவாமி மூலஸ்தானம் சென்றடைவார்.

விழாவின் முக்கிய நிகழ்வாகச் சுவாமி மடம் வீதி மற்றும் நான்கு ரத வீதிகளில் திருவுலா வந்து பக்தர்களுக்கு அருள்பாலிக்க உள்ளார். விழாவிற்கான ஏற்பாடுகளை திருக்கோயில் நிர்வாகத்தினர் செய்து வருகின்றனர்.