பலசரக்கு கடை உரிமையாளர் தற்கொலை : போலீஸ் விசாரணை!

» செய்திகள் - விளையாட்டு » மாவட்ட செய்தி (தூத்துக்குடி)

பலசரக்கு கடை உரிமையாளர் தற்கொலை : போலீஸ் விசாரணை!

செவ்வாய் 17, பிப்ரவரி 2026 8:27:14 AM (IST)

கயத்தாறு அருகே பலசரக்கு கடை உரிமையாளர், அளவுக்கு அதிகமான மாத்திரைகளை உட்கொண்டு தற்கொலை செய்து கொண்ட சம்பவம் அப்பகுதியில் சோகத்தை ஏற்படுத்தியுள்ளது.

தூத்துக்குடி மாவட்டம் கயத்தாறு அருகே உள்ள அய்யனாரூத்து தெற்குத் தெருவைச் சேர்ந்த ரிபாய் என்பவரின் மகன் அசரப் (33). திருமணமாகாத இவர், தனது ஊரில் பலசரக்கு கடை நடத்தி வந்தார். கடந்த சில காலமாக மனநல பாதிப்பிற்காக சிகிச்சை பெற்று வந்த அசரப், அவ்வப்போது தனது தந்தையின் சொந்த ஊரான வீராணத்திற்குச் சென்று உறவினர்களுடன் தங்கிவிட்டு வருவது வழக்கம்.

கடந்த 8-ம் தேதி, வீராணத்திற்குச் செல்வதாகத் தனது தாயிடம் கூறிவிட்டுச் சென்ற அசரப், நீண்ட நாட்களாகியும் வீடு திரும்பவில்லை. இதனால் கவலையடைந்த அவரது தாயார் அவரைத் தேடி வந்துள்ளார்.

இந்நிலையில், அய்யனாரூத்திலிருந்து கயத்தாறு செல்லும் சாலையில் உள்ள கன்னி கோவில் அருகே, பஞ்சாயத்திற்குச் சொந்தமான கருங்காட்டிலிருந்து கடும் துர்நாற்றம் வீசியுள்ளது. இதைக் கவனித்த அக்கம் பக்கத்தினர் அங்கு சென்று பார்த்தபோது, அசரப் சடலமாகத் கிடப்பதைக் கண்டு அதிர்ச்சியடைந்தனர். அவரது உடல் அழுகிய நிலையில் காணப்பட்டது.

உடலுக்கு அருகே குளிர்பான பாட்டில் மற்றும் மனநல சிகிச்சைக்கான மாத்திரை அட்டைகள் சிதறிக் கிடந்தன. தகவல் அறிந்து சம்பவ இடத்திற்கு வந்த கயத்தாறு போலீஸ் இன்ஸ்பெக்டர் ஆனந்தகுமார் மற்றும் சப்-இன்ஸ்பெக்டர் காந்தி ராஜன் தலைமையிலான போலீசார், உடலை மீட்டு உடற்கூறு ஆய்வுக்காக நெல்லை அரசு மருத்துவமனைக்கு அனுப்பி வைத்தனர்.

மனநல பாதிப்பால் அவதிப்பட்டு வந்த அசரப், அளவுக்கு அதிகமான மாத்திரைகளை குளிர்பானத்தில் கலந்து குடித்து தற்கொலை செய்து கொண்டிருக்கலாம் எனத் தெரிகிறது. இது குறித்து போலீசார் வழக்குப் பதிவு செய்து தொடர்ந்து விசாரணை நடத்தி வருகின்றனர்.

மக்கள் கருத்து

மக்கள் பதிவு செய்யும் கருத்துகள் தணிக்கையின்றி பிரசுரமாகும் வகையில் மென்பொருள் வடிவமைக்கப்பட்டுள்ளது. தொழில்நுட்ப குறைபாடுகள் காரணமாக கருத்துக்கள் பதிவாவதில் சிறிது காலதாமதம் ஏற்பட வாய்ப்புள்ளது. வாசகர்களின் கருத்துக்களுக்கு நிர்வாகம் பொறுப்பாக மாட்டார்கள். நாகரீகமற்ற மற்றும் பிறர் மனதை புண்படுத்தகூடிய கருத்துகளை / வார்த்தைகளைப் பயன்படுத்துவதை தவிர்க்கும்படி கேட்டுக்கொள்கிறோம்.

ஆங்கிலத்தில் தட்டச்சு செய்ய Ctrl+G -ஐ அழுத்தவும்.

பெயர்: கருத்து: