ஓட்டப்பிடாரம் தொகுதியில் வெற்றி யாருக்கு? பலமுனை போட்டியால் வாக்குகள் சிதறும் நிலை!

தூத்துக்குடி மாவட்டத்தின் முக்கியத் தனித் தொகுதியான ஓட்டப்பிடாரம், 2026 சட்டமன்றத் தேர்தலில் தமிழகத்தின் உற்றுநோக்கப்படும் தொகுதிகளில் ஒன்றாக மாறியுள்ளது. ஒருகாலத்தில் மிகவும் பின்தங்கிய பகுதியாகக் கருதப்பட்ட இத்தொகுதி, தற்போது அரசியல் குழப்பங்கள் மற்றும் பலமுனைப் போட்டிகளால் பரபரப்பான சூழலில் உள்ளது.

தொகுதிப் பின்னணி: சுமார் 2 லட்சத்து 41 ஆயிரம் வாக்காளர்களைக் கொண்ட விவசாயப் பூமியான ஓட்டப்பிடாரத்தில், புதியம்புத்தூர் ஆயத்த ஆடை தொழில் மட்டுமே பிரதானமாக இருந்தது. கடந்த 5 ஆண்டுகால திமுக ஆட்சியில் பல்வேறு தொழிற்சாலைகள் கொண்டுவரப்பட்டதும், தூத்துக்குடி மாநகராட்சியின் சில வார்டுகள் இத்தொகுதியுடன் இணைக்கப்பட்டதும் குறிப்பிடத்தக்க மாற்றங்களாகும். 15 தேர்தல்களைச் சந்தித்துள்ள இத்தொகுதியில் காங்கிரஸ், திமுக, அதிமுக மற்றும் புதிய தமிழகம் உள்ளிட்ட பல்வேறு கட்சிகள் வெற்றி பெற்றுள்ளன.

கடந்த 2021 தேர்தலில் திமுக சார்பில் போட்டியிட்ட எம்.சி.சண்முகய்யா, அதிமுகவின் மோகனை விட 9,000 வாக்குகள் வித்தியாசத்தில் வெற்றி பெற்றார். ஆனால், இந்த முறை அவருக்கு வாய்ப்பு மறுக்கப்பட்டு, அமைச்சர் அனிதா ராதாகிருஷ்ணனின் தீவிர ஆதரவாளரான குரும்பூரைச் சேர்ந்த ராமஜெயம் களம் இறக்கப்பட்டுள்ளார்.

"தொகுதிக்குச் சம்பந்தமில்லாத வெளியூர் வேட்பாளர்" என்ற அதிருப்தி திமுக தொண்டர்களிடையே புகைந்து வருகிறது. ஏற்கனவே தொகுதியில் செல்வாக்குடன் இருக்கும் இளையராஜா, அம்பா சங்கர், காசி விஸ்வநாதன் ஆகியோரைத் தவிர்த்துவிட்டு ராமஜெயத்தை அறிவித்தது அக்கட்சியினரிடையே அதிருப்தியை ஏற்படுத்தியுள்ளது.

சண்முகய்யாவின் அடுத்த கட்டம்: நில மோசடி புகார்களில் சிக்கிய தனது சகோதரரால் வாய்ப்பு மறுக்கப்பட்டதாகக் கூறப்படும் முன்னாள் எம்.எல்.ஏ. சண்முகய்யா, கடந்த சனிக்கிழமை புதுச்சேரியில் தமிழக வெற்றிக் கழகத் தலைவர் விஜயைச் சந்திக்க முயன்றதாகத் தகவல் வெளியாகியுள்ளது. அது தோல்வியில் முடிந்ததாகக் கூறப்பட்டாலும், அவரது ஆதரவாளர்கள் சமூக வலைதளங்களில் சண்முகய்யாவைத் தவெக வேட்பாளராகச் சித்திரிக்கத் தொடங்கியுள்ளனர். தவெக வாய்ப்பு கிடைக்காவிட்டால் அவர் சுயேச்சையாகப் போட்டியிடவும் திட்டமிட்டுள்ளார்.

இத்தொகுதியில் தற்போது பலமுனைப் போட்டி நிலவுகிறது:

• திமுக: ராமஜெயம் (அமைச்சர் அனிதா ராதாகிருஷ்ணனின் ஆதரவாளர்)

• என்.டி.ஏ கூட்டணி: சுந்தர்ராஜ் (முன்னாள் எம்.எல்.ஏ)

• தவெக: மதன் ராஜா (இவரது வேட்புமனுத் தாக்கல் தற்போது நிறுத்தி வைக்கப்பட்டுள்ளது)

• நாம் தமிழர்: மு. அனுசியா

• புதிய தமிழகம்: டாக்டர் கிருஷ்ணசாமி

அமைச்சர் அனிதா ராதாகிருஷ்ணன், தூத்துக்குடி மேயர் ஜெகன் பெரியசாமியை மட்டுமே நம்பியுள்ளார். மாநகராட்சிக்குட்பட்ட பகுதியில் உள்ள சுமார் 40,000 வாக்குகளை ஒட்டுமொத்தமாக அறுவடை செய்தால் ராமஜெயத்தை எளிதாக வெற்றிபெறச் செய்யலாம் என்பது அவரது கணக்கு.

இருப்பினும், என்.டி.ஏ வேட்பாளர் சுந்தர்ராஜுக்குப் போதிய செல்வாக்கு இல்லையென்ற பேச்சும், டாக்டர் கிருஷ்ணசாமிக்குத் தொகுதியில் முந்தைய செல்வாக்கு நீடிக்குமா என்ற சந்தேகமும் எழுந்துள்ளது. இதற்கிடையில், தவெக வேட்பாளர் மதன் ராஜாவின் வேட்புமனுத் தாக்கலைத் தலைமை தடுத்து நிறுத்தியுள்ளது, சண்முகய்யா தவெகவில் இணையக்கூடும் என்ற யூகத்தை வலுப்படுத்தியுள்ளது.

உட்கட்சிப் பூசல், வெளியூர் வேட்பாளர் எதிர்ப்பு, அதிருப்தி வேட்பாளரின் கலகம் எனப் பல்வேறு சிக்கல்களுக்கிடையே ஓட்டப்பிடாரம் தொகுதியில் வெற்றி வாகை சூடப்போவது யார் என்பதைத் தீர்மானிக்கும் சக்தியாகப் பொதுமக்கள் உள்ளனர்.