ரயில்வே கீழ்நிலை பாலத்தை மேல்நிலைப் பாலமாக மாற்ற வண்டும்: கிராம மக்கள் கோரிக்கை!

» செய்திகள் - விளையாட்டு » மாவட்ட செய்தி (தூத்துக்குடி)

ரயில்வே கீழ்நிலை பாலத்தை மேல்நிலைப் பாலமாக மாற்ற வண்டும்: கிராம மக்கள் கோரிக்கை!

திங்கள் 22, ஜூன் 2026 3:42:17 PM (IST)

ரயில்வே கீழ்நிலை பாலத்தில் ஆண்டுக்குச் சுமார் 8 மாதங்கள் தண்ணீர் தேங்கி நிற்பதால் மேல்நிலைப் பாலம் அமைக்க வேண்டும் என்று கோடாங்கால் கிராம மக்கள் கோரிக்கை விடுத்துள்ளனர்.

தூத்துக்குடி மாவட்டம் கயத்தாறு வட்டம் கடம்பூர் பேரூராட்சியில் கோடாங்கால் என்ற சங்கரப்பேரி கிராமம் அமைந்துள்ளது. இக்கிராம மக்களின் போக்குவரத்து வசதிக்காகச் சுமார் ஐந்து ஆண்டுகளுக்கு முன்பு ரயில்வே நிர்வாகம் அங்குப் பயன்பாட்டில் இருந்த ரயில்வே கேட்டை அப்புறப்படுத்திவிட்டு, கோடாங்கால் குளத்திற்கு அருகில் ஒரு கீழ்நிலை பாலம் அமைத்தது.

வடகிழக்கு பருவமழை மற்றும் இதர காலங்களில் அருகில் உள்ள குளம் நிரம்பும்போது, குளத்து நீர் கசிந்து இந்த ரயில்வே கீழ்நிலை பாலத்திற்குள் புகுந்து விடுகிறது. நீரேற்றும் மோட்டார்கள் மூலமாகப் பாலத்திற்குள் இருக்கும் நீரை வெளியேற்றினாலும், குளத்து நீர் தொடர்ந்து கசிவதால் பாலம் எப்போதும் தண்ணீராலேயே நிரம்பிக் காணப்படுகிறது.

இக்கிராமத்தை வெளி ஊர்களுடன் இணைக்க இந்த ஒரு பாலம் மட்டுமே பிரதான பாதையாக உள்ளது. இதில் ஆண்டுக்குச் சுமார் எட்டு மாத காலம் தொடர்ந்து நீர் தேங்கி நிற்பதால், கிராமத்து விவசாயிகள், பள்ளி குழந்தைகள், அவசரச் சிகிச்சை தேவைப்படும் நோயாளிகள் உட்படப் பொதுமக்கள் அனைவரும் வெளி ஊர்களுக்குச் செல்ல முடியாமல் தவித்து வருகின்றனர்.

எனவே, இந்த விவகாரத்தில் மாவட்ட நிர்வாகம் உடனடியாகத் தலையிட்டு, மக்கள் தற்காலிகமாகப் பயன்படுத்தப் பாலம் அமைத்துத் தர வேண்டும் என்றும், இந்தப் பிரச்சினைக்கு நிரந்தரத் தீர்வாகத் தற்போதைய கீழ்நிலை பாலத்தை மேல்நிலைப் பாலமாக மாற்றித் தந்து போக்குவரத்தைச் சீர் செய்ய வேண்டும் என்றும் கிராம மக்கள் சார்பாகத் தூத்துக்குடி மாவட்ட ஆட்சித்தலைவரிடம் கோரிக்கை மனு அளிக்கப்பட்டுள்ளது.

மக்கள் கருத்து

மக்கள் பதிவு செய்யும் கருத்துகள் தணிக்கையின்றி பிரசுரமாகும் வகையில் மென்பொருள் வடிவமைக்கப்பட்டுள்ளது. தொழில்நுட்ப குறைபாடுகள் காரணமாக கருத்துக்கள் பதிவாவதில் சிறிது காலதாமதம் ஏற்பட வாய்ப்புள்ளது. வாசகர்களின் கருத்துக்களுக்கு நிர்வாகம் பொறுப்பாக மாட்டார்கள். நாகரீகமற்ற மற்றும் பிறர் மனதை புண்படுத்தகூடிய கருத்துகளை / வார்த்தைகளைப் பயன்படுத்துவதை தவிர்க்கும்படி கேட்டுக்கொள்கிறோம்.

ஆங்கிலத்தில் தட்டச்சு செய்ய Ctrl+G -ஐ அழுத்தவும்.

பெயர்: கருத்து: