குடோன் வசதி இல்லாததால் மழையில் நனைந்து 500 நெல் மூட்டைகள் நாசம் : விவசாயிகள் கவலை!

» செய்திகள் - விளையாட்டு » மாவட்ட செய்தி (தூத்துக்குடி)

குடோன் வசதி இல்லாததால் மழையில் நனைந்து 500 நெல் மூட்டைகள் நாசம் : விவசாயிகள் கவலை!

ஞாயிறு 10, மே 2026 9:38:57 AM (IST)

சாத்தான்குளம் நெல் கொள்முதல் நிலையத்தில் போதிய குடோன் வசதி இல்லாததால், திறந்தவெளியில் வைக்கப்பட்டிருந்த 500-க்கும் மேற்பட்ட நெல் மூட்டைகள் மழையில் நனைந்து வீணாகின. இதனால் விவசாயிகள் வேதனையடைந்துள்ளனர்.

தூத்துக்குடி மாவட்டம் சாத்தான்குளம் மற்றும் அதன் சுற்றுவட்டாரப் பகுதிகளில் நேற்று முன்தினம் மாலை முதல் நேற்று அதிகாலை வரை பலத்த மழை பெய்தது. இதில் சுமார் 68 மில்லி மீட்டர் மழை பதிவானது. திருநெல்வேலி வேளாண் வணிகத் துறையின் கீழ் செயல்பட்டு வரும் சாத்தான்குளம் கொள்முதல் நிலையத்தில், விவசாயிகள் கொண்டு வந்த நெல் மூட்டைகள் திறந்தவெளியில் அடுக்கி வைக்கப்பட்டிருந்தன.

குடோன் வசதி இல்லாத சூழலில், மழை பெய்யும்போது மூட்டைகளைப் பாதுகாக்கத் தார்பாய் உள்ளிட்ட வசதிகளும் செய்யப்படவில்லை எனக் கூறப்படுகிறது. இதனால் சுமார் 500-க்கும் மேற்பட்ட மூட்டைகள் மழை நீரில் முழுமையாக நனைந்து முளைவிடும் நிலைக்குத் தள்ளப்பட்டுள்ளன.

இது குறித்துப் பாதிக்கப்பட்ட விவசாயிகள் கூறியதாவது: "நாங்கள் கஷ்டப்பட்டு விளைவித்துக் கொண்டு வந்த நெல் மூட்டைகளைத் தார்பாய் கூடப் போடாமல் வெட்ட வெளியில் போட்டு வைத்துள்ளனர். மழை பெய்து மூட்டைகள் நனைந்த பிறகும், அவற்றை மீட்டுப் பாதுகாப்பான இடத்திற்கு மாற்றப் பணியாளர்கள் யாரும் முன்வரவில்லை. இதனால் நெல் அனைத்தும் நாசமாகி வருகிறது.

ஆண்டுதோறும் இது போன்ற பாதிப்புகள் தொடர்வதால், சாத்தான்குளம் கொள்முதல் நிலையத்தில் நிரந்தரமான குடோன் வசதியை ஏற்படுத்த வேண்டும் எனவும், மழையினால் சேதமடைந்த நெல் மூட்டைகளுக்கு உரிய இழப்பீடு வழங்க மாவட்ட நிர்வாகம் நடவடிக்கை எடுக்க வேண்டும் எனவும் விவசாயிகள் கோரிக்கை விடுத்துள்ளனர்.

மக்கள் கருத்து

மக்கள் பதிவு செய்யும் கருத்துகள் தணிக்கையின்றி பிரசுரமாகும் வகையில் மென்பொருள் வடிவமைக்கப்பட்டுள்ளது. தொழில்நுட்ப குறைபாடுகள் காரணமாக கருத்துக்கள் பதிவாவதில் சிறிது காலதாமதம் ஏற்பட வாய்ப்புள்ளது. வாசகர்களின் கருத்துக்களுக்கு நிர்வாகம் பொறுப்பாக மாட்டார்கள். நாகரீகமற்ற மற்றும் பிறர் மனதை புண்படுத்தகூடிய கருத்துகளை / வார்த்தைகளைப் பயன்படுத்துவதை தவிர்க்கும்படி கேட்டுக்கொள்கிறோம்.

ஆங்கிலத்தில் தட்டச்சு செய்ய Ctrl+G -ஐ அழுத்தவும்.

பெயர்: கருத்து: