குலசேகரன்பட்டினம் ராக்கெட் ஏவுதளப் பகுதியில் கடல் அரிப்பைத் தடுக்க உயிரி வேலி: வனத்துறை நடவடிக்கை!

தூத்துக்குடி மாவட்டம் குலசேகரன்பட்டினத்தில் அமைக்கப்பட்டு வரும் இந்தியாவின் இரண்டாவது ராக்கெட் ஏவுதளப் பகுதியை கடல் அரிப்பிலிருந்து பாதுகாக்க, தமிழ்நாடு வனத்துறை சார்பில் பிரம்மாண்டமான முறையில் மரக்கன்றுகள் நடப்பட்டு "உயிரி வேலி"  அமைக்கப்பட்டு வருகிறது.

குலசேகரன்பட்டினத்தில் சுமார் 2,350 ஏக்கர் பரப்பளவில், ₹986 கோடி மதிப்பீட்டில் சிறிய செயற்கைக்கோள்களை (SSLV) ஏவுவதற்காக இந்தத் தளம் பிரத்யேகமாக உருவாக்கப்பட்டு வருகிறது. இதன் கட்டுமானப் பணிகள் தற்போது தீவிரமாக நடைபெற்று வரும் சூழலில், கடற்கரை ஓரங்களில் ஏற்படும் மண் அரிப்பைத் தடுக்க வனத்துறை இந்த நடவடிக்கையை மேற்கொண்டுள்ளது.

குலசேகரன்பட்டினத்திற்கு தெற்கே 3 கி.மீ தொலைவில், சுமார் 123.55 ஏக்கர் (50 ஹெக்டேர்) பரப்பளவில் இந்த உயிரி வேலி உருவாக்கப்படுகிறது. 2 கி.மீ நீளமும், 250 மீட்டர் அகலமும் கொண்ட பகுதியில் அடர்த்தியான மரவரிசைகள் நடப்படுகின்றன. சவுக்கு (Casuarina), முந்திரி, பனை, தாழை (Pandanus), வேம்பு உள்ளிட்ட உள்நாட்டு வகை மரங்கள் மற்றும் படரும் தன்மை கொண்ட இரண்டு வகையான பூர்வீகப் புற்கள் வளர்க்கப்படுகின்றன.

இது குறித்து தூத்துக்குடி மாவட்ட வன அலுவலர் எம். இளையராஜா தெரிவிக்கையில், "இந்த அடர்த்தியான அடுக்கு மரங்கள் கடல் அலைகளின் வேகத்தை உள்வாங்கும் திறன் கொண்டவை. இவை மணல் திட்டுக்களை நிலைப்படுத்துவதுடன், இயற்கைச் சீற்றங்களின் போது அலைகளின் தாக்கத்தைக் குறைத்து நிலப்பகுதியைப் பாதுகாக்கும்" என்றார்.

இஸ்ரோ (ISRO) விஞ்ஞானிகளின் தகவல்படி, கடந்த நவம்பர் மாதம் தொடங்கப்பட்ட இந்த உயிரி வேலி அமைக்கும் பணி தற்போது 2.1 கி.மீ தூரத்திற்கு வெற்றிகரமாக முடிவடைந்துள்ளது. எதிர்காலத்தில் இது ஏவுதளத்தைச் சுற்றி 5 கி.மீ தூரத்திற்கு விரிவுபடுத்தப்படும்.

தற்போது ஏவுதளத்தின் 50 சதவீத கட்டுமானப் பணிகள் நிறைவடைந்துள்ளன. இந்த ஆண்டு இறுதிக்குள் பெரும்பாலான வசதிகள் தயாராகிவிடும் என்றும், 2027-ம் ஆண்டின் முதல் காலாண்டில் குலசேகரன்பட்டினத்திலிருந்து முதல் ராக்கெட் ஏவப்பட வாய்ப்புள்ளதாகவும் விஞ்ஞானிகள் தெரிவித்துள்ளனர்.