இளைஞர் அடித்துக் கொலை: குற்றவாளிகளை கைது செய்யக்கோரி எஸ்பியிடம் உறவினர்கள் மனு!

தூத்துக்குடி அருகே இளைஞர் அடித்துக் கொலை செய்யப்பட்ட வழக்கில் மீதமுள்ள குற்றவாளிகளை கைது செய்யக்கோரி மாவட்ட காவல் கண்காணிப்பாளரிடம் உறவினர்கள் மனு அளித்தனர். 

தூத்துக்குடி மாவட்டம் நாரைக்கிணறு அருகே கீழக்கோட்டை கிராமத்தைச் சேர்ந்தவர் முருகன் மகன் தமிழ் ராஜ் (30). கடந்த பிப்ரவரி 10-ஆம் தேதி அன்று, பக்கத்து ஊரான கலப்பப்பட்டியைச் சேர்ந்த ரமேஷ் என்பவரது மனைவி லட்சுமி மற்றும் அவரது குடும்பத்தினருக்கும் தமிழ் ராஜுக்கும் இடையே மோதல் ஏற்பட்டுள்ளது. இந்தத் தகராறில் லட்சுமியின் குடும்பத்தினர் தமிழ்ராஜை கடுமையாகத் தாக்கியதாகத் தெரிகிறது.

தாக்குதலில் படுகாயமடைந்த தமிழ் ராஜ், மருத்துவமனையில் தீவிர சிகிச்சை பிரிவில் அனுமதிக்கப்பட்டிருந்தார். இருப்பினும், சிகிச்சை பலனின்றி நேற்று 20-ஆம் தேதி அவர் பரிதாபமாக உயிரிழந்தார். இச்சம்பவம் குறித்து நாரைக்கிணறு காவல்துறையினர் கொலை வழக்குப் பதிவு செய்து விசாரணை மேற்கொண்டனர். இந்த விசாரணை அடிப்படையில் பிரவீன் என்பவர் மட்டும் தற்போது கைது செய்யப்பட்டுள்ளார்.

இந்நிலையில், இக்கொலை வழக்கில் தொடர்புடைய மேலும் 5பேர் இன்னும் கைது செய்யப்படாமல் சுதந்திரமாக சுற்றி வருவதாகவும், அவர்களை உடனடியாகக் கைது செய்ய வலியுறுத்தியும் இன்று அவரது உறவினர்கள் மற்றும் பொதுமக்கள் திமுக பிரமுகர் கோமதி தலைமையில் எஸ்பி அலுவலகத்தை முற்றுகையிட்டு மனு அளித்தனர். தலைமறைவாக உள்ள மற்ற குற்றவாளிகளையும் பாரபட்சமின்றி விரைந்து கைது செய்ய வேண்டும் என காவல்துறையினருக்கு கோரிக்கை விடுத்துள்ளனர்.