மக்காச்சோளம் அறுவடைக்குச் சென்றபோது பன்றி கடித்து பெண் உட்பட 2 பேர் காயம்

எட்டயபுரம் அருகே மக்காச்சோளம் அறுவடைக்குச் சென்ற பெண் உட்பட 2 பேரை பன்றி கடித்துக் காயப்படுத்திய சம்பவம் விவசாயிகளிடையே அதிர்ச்சியை ஏற்படுத்தியுள்ளது.

தூத்துக்குடி மாவட்டம், எட்டயபுரம் தாலுகா அயன்ராஜாபட்டி ஊராட்சி கைலாசபுரம் கிராமத்தில் உள்ள விளைநிலங்களில் நேற்று காலை மக்காச்சோளம் அறுவடை பணி நடந்தது. அப்போது தோட்டத்திலிருந்து ஆக்ரோஷமாக ஓடிவந்த பன்றி ஒன்று, அறுவடை செய்துகொண்டிருந்த லட்சுமி மற்றும் நிலத்தின் உரிமையாளர் மூர்த்தி ஆகியோரைத் தாக்கி கடித்தது.

காயமடைந்த இருவரும் சாத்தூர் அரசு மருத்துவமனையில் சிகிச்சைக்காக அனுமதிக்கப்பட்டுள்ளனர். அப்பகுதியில் உள்ள முட்செடிகளுக்குள் பன்றிகள் குட்டிகளுடன் சுற்றித் திரிவதாகவும், அவை அவ்வப்போது பயிர்களைச் சேதப்படுத்துவதோடு தொழிலாளர்களையும் கடித்து வருவதாக விவசாயிகள் தெரிவிக்கின்றனர். பாதுகாப்பான முறையில் அறுவடை நடைபெற அதிகாரிகள் உரிய நடவடிக்கை எடுக்க வேண்டும் என கரிசல் பூமி விவசாயிகள் சங்கத் தலைவர் வரதராஜன் தமிழக அரசுக்குக் கோரிக்கை விடுத்துள்ளார்.