அமைச்சர் அனிதா ஆர். ராதாகிருஷ்ணன் மீதான சொத்துக் குவிப்பு வழக்கு: பிப். 24-ஆம் தேதிக்கு ஒத்திவைப்பு!

தமிழக அமைச்சர் அனிதா ஆர். ராதாகிருஷ்ணன் மீதான சொத்துக் குவிப்பு வழக்கு விசாரணையை, பிப்ரவரி 24-ஆம் தேதிக்கு ஒத்திவைத்து தூத்துக்குடி மாவட்ட முதன்மை நீதிமன்ற நீதிபதி வசந்தி நேற்று உத்தரவு பிறப்பித்தார்.

தமிழக மீன்வளம், மீனவர் நலன் மற்றும் கால்நடை பராமரிப்புத் துறை அமைச்சர் அனிதா ஆர். ராதாகிருஷ்ணன், அவரது குடும்பத்தினர் மற்றும் சகோதரர்கள் மீது வருமானத்திற்கு அதிகமாகச் சொத்து சேர்த்ததாகத் தொடரப்பட்ட வழக்கு, தூத்துக்குடி மாவட்ட நீதிமன்றத்தில் நடைபெற்று வருகிறது. இந்த வழக்கில் அரசுத் தரப்பு சாட்சிகளிடம் விசாரணை நிறைவடைந்துள்ள நிலையில், தற்போது இறுதிக்கட்ட விசாரணை நடைபெற்று வருகிறது.

இந்நிலையில், இந்த வழக்கு நேற்று (புதன்கிழமை) மீண்டும் விசாரணைக்கு வந்தது. அப்போது: அமைச்சர் அனிதா ஆர். ராதாகிருஷ்ணன், அவரது மனைவி மற்றும் மகன் அனந்த ராமகிருஷ்ணன் ஆகியோர் ஆஜராகவில்லை. அமைச்சரின் சகோதரர்கள் சண்முகநாதன் மற்றும் சிவானந்தன் ஆகியோரும் நீதிமன்றத்தில் முன்னிலையாகவில்லை. அமைச்சரின் மூன்று மகன்களில் அனந்த பத்மநாபன் மற்றும் அனந்த மகேஸ்வரன் ஆகிய இருவர் மட்டுமே நேரில் ஆஜராகினர். இதையடுத்து, வழக்கைப் பரிசீலித்த நீதிபதி வசந்தி, அடுத்தகட்ட விசாரணையை பிப்ரவரி 24-ஆம் தேதிக்கு ஒத்திவைத்து உத்தரவிட்டார்.