இலங்கைக்கு கடத்த முயன்ற ரூ.60 லட்சம் மதிப்புள்ள பீடி இலைகள் பறிமுதல்: தூத்துக்குடியில் 3பேர் கைது!

தூத்துக்குடியில் இருந்து இலங்கைக்கு கடத்த முயன்ற ரூ.60 லட்சம் மதிப்புள்ள பீடி இலைகளை கியூ பிரிவு போலீசார் பறிமுதல் செய்துள்ளனர். இது தொடர்பாக 3பேரை கைது செய்து விசாரணை நடத்தி வருகின்றனர். 

தூத்துக்குடி தாளமுத்து வெள்ளப்பட்டி கடற்கரையில் இன்று கியூ பிரிவு காவல் ஆய்வாளர் விஜய அனிதா தலைமையில் உதவி ஆய்வாளர் ஜீவமணி தர்மராஜ், சிறப்பு உதவி ஆய்வாளர் ராமர், தலைமை காவலர் இருதயராஜ், குமார், இசக்கி முத்து, முதல் நிலை காவலர் பழனி, பாலமுருகன் ஆகியோர் ரோந்து பணியில் ஈடுபட்டிருந்தபோது இலங்கைக்கு படகுகள் மூலம் கடத்துவதற்காக கொண்டு வரப்பட்ட 68 மூட்டை பீடி இலைகளை கைப்பற்றினர். 

இது தொடர்பாக சிலுவை பட்டி கணபதி நகர் தங்கசாமி மகன் மகேஷ் குமார் (28), தாளமுத்து நகர் எம்ஜிஆர் நகர் அருளப்பன் மகன் அருளப்பன் ஆண்டனி ஜோசப் (40), தங்கசாமி மகன் மாயாண்டி (38) ஆகிய 3பேரை போலீசார் கைது செய்து விசாரணை நடத்தி வருகின்றனர். மேலும், சரக்கு வாகனங்களில் கொண்டுவரப்பட்ட சுமார் 60 இலட்சம் மதிப்புள்ள பீடி இலைகள், கடத்தலில் ஈடுபட்ட 3 பேர் பயன்படுத்திய பைக்குகளை போலீசார் பறிமுதல் செய்துள்ளனர்.