ஓடை பாலத்தில் தவறி விழுந்து டிரைவர் சாவு : பஸ்சுக்காக காத்திருந்தபோது பரிதாபம்

நாலாட்டின்புத்தூர் அருகே பஸ்சுக்காக ஓடைப்பாலத்தில் உட்கார்ந்து இருந்த டிரைவர் தவறி விழுந்து பரிதாபமாக உயிரிழந்தார். .

நெல்லை மாவட்டம் செட்டிகுளம் சீவலப்பேரி ரோடு பகுதியை சேர்ந்த குருசாமி மகன் ரமேஷ்பாபு (45). டிரைவராக வேலை பார்த்து வந்தார். இவரது மனைவி கல்பனா (39). இவர்களுக்கு குருபரதன் (15) என்ற மகன் உள்ளார். ரமேஷ்பாபு நேற்று முன்தினம் வேலை நிமித்தமாக கோவில்பட்டிக்கு வந்துள்ளார். பின்னர் நாலாட்டின்புத்தூர் அருகே உள்ள தனியார் டைல்ஸ் கம்பெனி அருகில் நெல்லை - மதுரை தேசிய நெடுஞ்சாலையில் நெல்லை செல்வதற்காக அப்பகுதியில் உள்ள ஓடைப்பாலத்தில் அமர்ந்திருந்தார்.

அப்போது எதிர்பாராத விதமாக திடீரென அந்த பாலத்தில் இருந்து தவறி பின்னால் உள்ள பள்ளத்தில் விழுந்துள்ளார். சுமார் 10 அடி ஆழமுள்ள பள்ளத்தில் விழுந்ததால் தலையில் படுகாயம் அடைந்த நிலையில் மயங்கி கிடந்துள்ளார். இது குறித்து அப்பகுதி மக்கள் கொடுத்த தகவலின் பேரில் நாலாட்டின்புத்தூர் போலீஸ் இன்ஸ்பெக்டர் காளிமுத்து மற்றும் போலீசார் அப்பகுதிக்கு சென்று, படுகாயங்களுடன் கிடந்த அவரை மீட்டு 108 ஆம்புலன்சில் ஏற்றி கோவில்பட்டி அரசு மருத்துவமனைக்கு சிகிச்சைக்காக அனுப்பி வைத்தனர். 

அங்கு அவருக்கு முதலுதவி அளிக்கப்பட்டு பின்னர் மேல் சிகிச்சைக்காக நெல்லை அரசு மருத்துவமனையில் சேர்க்கப்பட்டார். அங்கு அவருக்கு தீவிர சிகிச்சை அளிக்கப்பட்டு வந்த நிலையில் நேற்று காலையில் அவர் பரிதாபமாக இறந்தார். இது குறித்து நாலாட்டின்புத்தூர் போலீசார் வழக்கு பதிவு செய்து விசாரணை நடத்தி வருகின்றனர்.