தூத்துக்குடியில் வங்கி ஊழியர்கள் பேரணி: வாரத்தில் 5 நாட்கள் வேலையை அமல்படுத்த கோரிக்கை

தூத்துக்குடியில் வாரத்தில் 5 நாட்கள் வேலை முறையை அமல்படுத்த கோரி வங்கி ஊழியர்கள் பேரணி நடத்தினர்.

வங்கி ஊழியர்கள் சங்கங்களின் கூட்டமைப்பு சார்பில் வங்கி ஊழியர்கள் அனைவருக்கும் வாரத்தில் 5 நாட்கள் வேலை என்பதை அமல்படுத்த வேண்டும் என்று வலியுறுத்தி வருகிற 27-ந் தேதி வேலை நிறுத்த போராட்டம் நடக்கிறது. இதனை முன்னிட்டு தூத்துக்குடியில் வங்கி ஊழியர்களின் கோரிக்கை பேரணி நேற்று மாலையில் நடந்தது. தூத்துக்குடி பி.எஸ்.என்.எல் அலுவலகம் முன்பு தொடங்கிய பேரணி தெற்கு பீச் ரோட்டில் உள்ள ஸ்டேட் வங்கி முன்பு முடிவடைந்தது.

இந்த பேரணிக்கு பாரதஸ்டேட் வங்கி ஊழியர் சங்க உதவி பொதுச் செயலாளர் கார்த்திகேயன் தலைமை தாங்கினார். பாரத ஸ்டேட் வங்கி அதிகாரிகள் சங்க மண்டல செயலாளர் மெல்பர் சேவியோ, அகில இந்திய வங்கி ஊழியர் சங்க மாவட்ட தலைவர் ராமசுப்பிரமணியன், கனராவங்கி அதிகாரிகள் சங்க மண்டல செயலாளர் ஜெயராம், தேசிய வங்கி ஊழியர்கள் கூட்டமைப்பு மாவட்ட செயலாளர் ராஜாஆகியோர் முன்னிலை வகித்தனர்.

பேரணியில் பங்கேற்ற ஊழியர்கள் கோரிக்கையை வலியுறுத்தி பதாகை ஏந்தி சென்றனர். பேரணியில் வங்கி ஊழியர்கள் திரளாக கலந்து கொண்டனர். அகில இந்திய வங்கி ஊழியர் சங்க பொதுச் செயலாளர் சக்திவேல் நன்றி கூறினார்.