காமராஜ் கல்லூரியில் போதை விழிப்புணர்வு போட்டிகள்

தூத்துக்குடி காமராஜ் கல்லூரியில் நடைபெற்ற போதை விழிப்புணர்வு போட்டிகளில் வெற்றி பெற்றவர்களுக்கு பரிசுகள் வழங்கப்பட்டன.

தூத்துக்குடி மாவட்ட மதுவிலக்கு மற்றும் ஆயத்தீர்வை நிர்வாகமும், காமராஜ் கல்லூரி வரலாற்றுத் துறையும் இணைந்து, உலக போதைப் பொருள் பயன்பாடு மற்றும் கடத்தலுக்கு எதிரான விழிப்புணர்வு நிகழ்ச்சி காமராஜ் கல்லூரியில் நடைபெற்றது. நிகழ்ச்சியின்போது, போதைப் பொருள் தடுப்பு உறுதிமொழியை பேராசிரியர்கள், மாணவ, மாணவிகள் ஏற்றுக் கொண்டனர்.

போதைப்பொருள் ஒழிப்பதில் இளைஞர்களின் பங்கு என்ற தலைப்பில் கல்லூரி மாணவ, மாணவிகளுக்கான கட்டுரைப் போட்டி, பேச்சுப்போட்டி மற்றும் ஓவியப் போட்டி நடைபெற்றது. கட்டுரைப் போட்டியில், இயற்பியல் துறை முதுகலை இரண்டாமாண்டு மாணவி ராமலட்சுமி முதல் பரிசையும், விலங்கியல் துறை இளங்கலை முதலாமாண்டு மாணவி ஏ. பாரதி இரண்டாம் பரிசையும், பொருளாதாரத்துறை இளங்கலை இரண்டாமாண்டு மாணவி சு. ஆர்த்தி பாரதி மூன்றாவது பரிசையும் பெற்றனர்.

பேச்சுப் போட்டியில் வரலாற்றுத்துறை இளங்கலை இரண்டாமாண்டு மாணவி அஜிதா முதல் பரிசையும், இயற்பியல் துறை முதுகலை இரண்டாமாண்டு மாணவி ஜெசீனா இரண்டாம் பரிசையும், மைக்ரோ பயாலஜி முதுகலை இரண்டாமாண்டு மாணவி பால சரண்யா மூன்றாவது பரிசையும் பெற்றனர்.

ஓவியப் போட்டியில் வணிக மேலாண்மை இளங்கலை மூன்றாமாண்டு மாணவர் சூர்யா முதல் பரிசையும், வரலாற்றுத் துறை இளங்கலை மூன்றாமாண்டு மாணவர் கார்த்திக் இரண்டாம் பரிசையும், தாவரவியல் இளங்கலை முதலாமாண்டு மாணவி மகாலட்சுமி மூன்றாம் பரிசையும் பெற்றனர்.

போட்டிகளில் வெற்றி பெற்றவர்களுக்கு மாவட்ட கலால் பிரிவு உதவி ஆணையர் பி. செல்வநாயகம் பரிசுகள் மற்றும் சான்றிதழ்களை வழங்கினார். நிகழ்ச்சியில், கல்லூரி முதல்வர் பூங்கொடி, கலால் கோட்ட அலுவலர் தாமஸ் பயஸ் அருள், ஆய்வாளர் பிரபாகரன், கல்லூரி வரலாற்றுத்துறை தலைவர் ஆ. தேவராஜ் உள்ளிட்டோர் கலந்து கொண்டனர்.

முன்னதாக கல்லூரி வரலாற்றுத் துறை மூன்றாமாண்டு மாணவர் நத்தீஷ் வரவேற்றார். முடிவில், இரண்டாமாண்டு மாணவி கங்காதேவி நன்றி கூறினார்.