தாம்பரம் - திருவனந்தபுரம் அமித் பாரத் ரயிலைத் தினசரி ரயிலாக இயக்க கோரிக்கை

தாம்பரம் - திருவனந்தபுரம் வழித்தடத்தில் தற்போது வாராந்திர ரயிலாக இயக்கப்பட்டு வரும் 'அமித் பாரத்' விரைவு ரயிலைத் தினசரி ரயிலாக மாற்ற வேண்டும் எனத் தென் மாவட்ட ரயில் பயணிகள் மற்றும் சமூக ஆர்வலர்கள் மத்திய அரசுக்குக் கோரிக்கை விடுத்துள்ளனர்.

கடந்த ஜனவரி 23-ம் தேதி பிரதமர் நரேந்திர மோடி அவர்களால் தொடங்கி வைக்கப்பட்ட இந்த அமித் பாரத் ரயில், ஏசி வசதி இல்லாமலேயே நவீன வசதிகளுடன் குறைந்த கட்டணத்தில் பயணிக்கும் வகையில் வடிவமைக்கப்பட்டுள்ளது. இதனால் சாமானிய மக்கள் மற்றும் நடுத்தர வர்க்கத்தினர் இடையே இந்த ரயிலுக்குப் பெரும் வரவேற்பு கிடைத்துள்ளது.

ஐந்து செட் பெட்டிகள் ஒதுக்கீடு: சென்னை இணைப்பு பெட்டி தொழிற்சாலையிலிருந்து (ICF) தெற்கு ரயில்வே மண்டலத்திற்கு 5 செட் அமித் பாரத் பெட்டிகள் (Rakes) ஒதுக்கப்பட்டுள்ளன. இவற்றை வடமாநில ரயில்களுக்கு மட்டுமே பயன்படுத்தாமல், தமிழகத்திற்குள்ளேயே குறைந்தபட்சம் இரண்டு ரயில்களையாவது தினசரி ரயிலாக இயக்கப் பயன்படுத்த வேண்டும் எனப் பயணிகள் வலியுறுத்துகின்றனர்.

நிறைவுற்ற இருவழிப்பாதை பணிகள்: நாகர்கோவில் டவுன் - இரணியல் இடையிலான இருவழிப்பாதை பணிகள் முழுமையாக நிறைவு பெற்று ரயில்கள் இயக்கப்படுகின்றன. இதன் மூலம் ரயில்கள் 'கிராசிங்'கிற்காகக் காத்திருக்கும் நேரம் குறைந்துள்ளதால், கூடுதல் ரயில்களை இயக்கச் சாதகமான சூழல் நிலவுகிறது.

திருவனந்தபுரத்திலிருந்து காலை 10:40-க்குப் புறப்பட்டு, நள்ளிரவு 23:45-க்குத் தாம்பரம் செல்லும் இந்த ரயில், பகல் நேரப் பயணமாக இருந்தாலும் எப்போதும் காத்திருப்போர் பட்டியலிலேயே (Waiting List) உள்ளது. இது இந்த ரயிலுக்கான தேவையை உறுதிப்படுத்துகிறது.

தற்போது இந்த ரயில் வியாழக்கிழமைகளில் இயக்கப்படுகிறது. கன்னியாகுமரி மாவட்டத்திலிருந்து சென்னைக்கு வியாழக்கிழமை மட்டும் வந்தே பாரத், நெல்லை, அனந்தபுரி என 10 ரயில்கள் இயக்கப்படுகின்றன. இதேபோல் திருநெல்வேலியிலிருந்து 13 ரயில்கள் இயக்கப்படுகின்றன. இத்தனை ரயில்கள் இருந்தபோதிலும், அனைத்து ரயில்களும் முழுமையாக நிரம்பி வழிவதால், அமித் பாரத் ரயிலைத் தினசரி சேவையாக மாற்றினால் மட்டுமே பயணிகளின் கூட்ட நெரிசலைக் குறைக்க முடியும்.

சமீபத்தில் சட்டமன்றத் தேர்தலுக்கு முன்பாக அறிவிக்கப்பட்ட அமித் பாரத் ரயில்கள் அனைத்தும் தற்போது வாராந்திர ரயில்களாகவே உள்ளன. தென் மாவட்ட மக்களின் நீண்ட தூரப் பயணத்தைக் கருத்தில் கொண்டு, திருவனந்தபுரம் - தாம்பரம் அமித் பாரத் ரயிலை முதற்கட்டமாகத் தினசரி சேவையாக மாற்ற வேண்டும் எனப் பொதுமக்கள் கோரிக்கை விடுத்துள்ளனர்.