தூத்துக்குடியில் உப்பு உற்பத்தி தீவிரம்: டன் ரூ.1,300-ஆக விலை குறைந்தது!

» செய்திகள் - விளையாட்டு » மாவட்ட செய்தி (தூத்துக்குடி)

தூத்துக்குடியில் உப்பு உற்பத்தி தீவிரம்: டன் ரூ.1,300-ஆக விலை குறைந்தது!

செவ்வாய் 28, ஏப்ரல் 2026 8:28:45 AM (IST)

தூத்துக்குடி மாவட்டத்தில் கோடை வெயிலின் தாக்கம் அதிகரித்துள்ளதால் உப்பு உற்பத்தி கணிசமாக உயர்ந்துள்ளது. இதன் காரணமாக ஒரு டன் உப்பின் விலை ரூ.1,300-ஆகக் குறைந்துள்ளதாக உற்பத்தியாளர்கள் தெரிவித்துள்ளனர்.

தூத்துக்குடி மாவட்டத்தின் பிரதான தொழில்களில் ஒன்றாக உப்புத் தொழில் விளங்குகிறது. மாவட்டத்தில் சுமார் 20 ஆயிரம் ஏக்கர் பரப்பளவில் உப்பு உற்பத்தி நடைபெற்று வரும் நிலையில், ஆண்டுதோறும் சுமார் 20 லட்சம் டன் வரை உப்பு உற்பத்தி செய்யப்படுகிறது. இந்தியாவில் குஜராத்திற்கு அடுத்தபடியாக தூத்துக்குடியில்தான் அதிக அளவில் உப்பு விளைவிக்கப்படுகிறது.

கடந்த சில ஆண்டுகளாகக் கோடை காலத்தில் பெய்த மழையினால் உற்பத்தி பாதிக்கப்பட்டு, குஜராத்திலிருந்து உப்பு இறக்குமதி செய்யும் சூழல் இருந்தது. ஆனால், இந்த ஆண்டு கோடை மழை பெய்யாததாலும், வெயிலின் உக்கிரம் அதிகமாக இருப்பதாலும் உப்பளங்களில் உப்பு உற்பத்தி தீவிரமாக நடைபெற்று வருகிறது.

உற்பத்தி அதிகரித்துள்ளதால் உப்பின் விலை குறைந்துள்ளது. கடந்த ஒரு மாதத்திற்கு முன்பு ஒரு டன் உப்பு ரூ.2,000 முதல் ரூ.2,500 வரை விற்பனை செய்யப்பட்டு வந்தது. தற்போது வரத்து அதிகரித்துள்ளதால், அதன் விலை ரூ.1,300-ஆகக் குறைந்துள்ளது. விலை குறைந்தாலும், விற்பனை விறுவிறுப்பாக நடைபெற்று வருவதாக வியாபாரிகள் தெரிவிக்கின்றனர்.

தூத்துக்குடியில் உற்பத்தியாகும் உப்பு தென்னிந்திய மாநிலங்கள் மற்றும் வெளிநாடுகளுக்கு அதிக அளவில் ஏற்றுமதி செய்யப்படுகிறது. இந்தத் தொழிலை நம்பி சுமார் 50 ஆயிரத்திற்கும் மேற்பட்ட தொழிலாளர்கள் உள்ளனர். வரும் அக்டோபர் மாதம் வரை உற்பத்தி நீடிக்கும் என்பதால், தங்களுக்குத் தொடர்ந்து வேலை கிடைக்கும் என்று உப்பளத் தொழிலாளர்கள் மகிழ்ச்சி தெரிவித்துள்ளனர்.

மக்கள் கருத்து

மக்கள் பதிவு செய்யும் கருத்துகள் தணிக்கையின்றி பிரசுரமாகும் வகையில் மென்பொருள் வடிவமைக்கப்பட்டுள்ளது. தொழில்நுட்ப குறைபாடுகள் காரணமாக கருத்துக்கள் பதிவாவதில் சிறிது காலதாமதம் ஏற்பட வாய்ப்புள்ளது. வாசகர்களின் கருத்துக்களுக்கு நிர்வாகம் பொறுப்பாக மாட்டார்கள். நாகரீகமற்ற மற்றும் பிறர் மனதை புண்படுத்தகூடிய கருத்துகளை / வார்த்தைகளைப் பயன்படுத்துவதை தவிர்க்கும்படி கேட்டுக்கொள்கிறோம்.

ஆங்கிலத்தில் தட்டச்சு செய்ய Ctrl+G -ஐ அழுத்தவும்.

பெயர்: கருத்து: