மோட்டார் சைக்கிள் மீது லாரி மோதி விபத்து: ஒருவர் உயிரிழப்பு

» செய்திகள் - விளையாட்டு » மாவட்ட செய்தி (தூத்துக்குடி)

மோட்டார் சைக்கிள் மீது லாரி மோதி விபத்து: ஒருவர் உயிரிழப்பு - தூத்துக்குடியில் பரிதாபம்!

சனி 14, மார்ச் 2026 10:35:25 AM (IST)

தூத்துக்குடியில் இருசக்கர வாகனம் மீது லாரி மோதிய விபத்தில் சென்ட்ரிங் தொழிலாளி பரிதாபமாக உயிரிழந்தார். அவருடன் சென்ற மற்றொருவர் படுகாயம் அடைந்து தீவிர சிகிச்சை பெற்று வருகிறார்.

தூத்துக்குடி மாவட்டம் சாயர்புரம் பி.எஸ். கோவில் தெருவைச் சேர்ந்த நாராயணசாமி என்பவரின் மகன் வீரபாகு என்கிற கண்ணன் (46). இவரும், கூட்டம்புளி முத்து நகரைச் சேர்ந்த வேல்கனி என்பவரின் மகன் பிச்சைமணி (60) என்பவரும் சென்ட்ரிங் வேலை செய்து வருகின்றனர்.

நேற்று மதியம் சுமார் 3 மணி அளவில், இருவரும் டிவிஎஸ் எக்ஸ்எல் இருசக்கர வாகனத்தில் மடத்தூர் பைபாஸ் சாலையில் வடக்கிலிருந்து தெற்கு நோக்கிச் சென்று கொண்டிருந்தனர். சாய் பாபா பெட்ரோல் பங்க் அருகே சென்றபோது, பின்னால் வந்த லாரி முன்னால் சென்ற மற்றொரு லாரியை முந்திச் செல்ல முயன்றுள்ளது.

அப்போது லாரி மிக அருகில் வந்ததால் நிலைதடுமாறிய இருவரும் கீழே விழுந்தனர். இதில் லாரியின் பின்பக்க சக்கரம் ஏறியதில் வீரபாகு கண்ணனின் இரண்டு கால்களும் சிதைந்து, இடது கால் துண்டானது. பிச்சைமணிக்கு இடுப்பு எலும்பு முறிவு மற்றும் வலது காலில் பலத்த காயம் ஏற்பட்டது.

படுகாயமடைந்த இருவரும் உடனடியாக தூத்துக்குடி அரசு மருத்துவமனைக்குக் கொண்டு செல்லப்பட்டனர். வீரபாகு கண்ணனின் நிலைமை மிகவும் கவலைக்கிடமாக இருந்ததால், அவர் மேல் சிகிச்சைக்காக திருநெல்வேலி அரசு மருத்துவமனைக்கு மாற்றப்பட்டார். எனினும், அங்கு சிகிச்சை பலனின்றி இரவு 8 மணி அளவில் அவர் உயிரிழந்தார்.

பிச்சைமணிக்குத் தொடர்ந்து தீவிர சிகிச்சை அளிக்கப்பட்டு வருகிறது. விபத்து குறித்து சிப்காட் போலீசார் வழக்குப் பதிவு செய்து, லாரி ஓட்டுநரான புதுக்கோட்டை அய்யனார் காலனியைச் சேர்ந்த அம்மாமுத்து (27) என்பவரை கைது செய்து விசாரணை நடத்தி வருகின்றனர்.

மக்கள் கருத்து

மக்கள் பதிவு செய்யும் கருத்துகள் தணிக்கையின்றி பிரசுரமாகும் வகையில் மென்பொருள் வடிவமைக்கப்பட்டுள்ளது. தொழில்நுட்ப குறைபாடுகள் காரணமாக கருத்துக்கள் பதிவாவதில் சிறிது காலதாமதம் ஏற்பட வாய்ப்புள்ளது. வாசகர்களின் கருத்துக்களுக்கு நிர்வாகம் பொறுப்பாக மாட்டார்கள். நாகரீகமற்ற மற்றும் பிறர் மனதை புண்படுத்தகூடிய கருத்துகளை / வார்த்தைகளைப் பயன்படுத்துவதை தவிர்க்கும்படி கேட்டுக்கொள்கிறோம்.

ஆங்கிலத்தில் தட்டச்சு செய்ய Ctrl+G -ஐ அழுத்தவும்.

பெயர்: கருத்து: