வீட்டுமனைப் பட்டா வழங்காததைக் கண்டித்து தேர்தலை புறக்கணிக்க கிராம மக்கள் முடிவு

» செய்திகள் - விளையாட்டு » மாவட்ட செய்தி (தூத்துக்குடி)

வீட்டுமனைப் பட்டா வழங்காததைக் கண்டித்து தேர்தலை புறக்கணிக்க கிராம மக்கள் முடிவு

சனி 7, மார்ச் 2026 3:23:06 PM (IST)

தூத்துக்குடி மாவட்டம் விளாத்திகுளம் அருகே உள்ள இ.வேலாயுதபுரம் கிராம மக்கள், தங்களுக்கு 30 ஆண்டுகளாக வீட்டுமனைப் பட்டா வழங்காததைக் கண்டித்து, வரும் 2026 சட்டமன்றத் தேர்தலைப் புறக்கணிக்கப்போவதாக அரசுக்கு எச்சரிக்கை விடுத்துள்ளனர்.

கடந்த 1996-ம் ஆண்டு, அப்போதைய முதல்வர் கலைஞர் கருணாநிதி தலைமையிலான அரசால், மேல்மாந்தை ஊராட்சியைச் சேர்ந்த 110 ஆதிதிராவிடக் குடும்பங்களுக்குத் தலா 3 சென்ட் நிலம் வழங்கப்பட்டது. அப்போது வழங்கப்பட்ட 'வீட்டுமனை ஒப்படை உத்தரவு' படிவத்தைக் கொண்டு, இக்குடும்பத்தினர் அங்கு வீடுகள் கட்டி இரண்டு தலைமுறைகளாக வாழ்ந்து வருகின்றனர்.

பழைய வீடுகளை இடித்துவிட்டுப் புதிய வீடுகள் கட்ட முற்படும்போது, முறையான பட்டா இல்லாததால் அனுமதி மறுக்கப்படுகிறது. பட்டா இல்லாத காரணத்தால் புதிய மின் இணைப்புகளையும் பெற முடியாமல் மக்கள் தவித்து வருகின்றனர். சொந்தமாக நிலம் இருந்தும் அதனைப் பயன்படுத்த முடியாததால், பலர் விவசாய நிலங்களிலும், ஊருக்குள் வாடகை வீடுகளிலும் தஞ்சமடைந்துள்ளனர்.

கடந்த 30 ஆண்டுகளாக வட்டாட்சியர், மாவட்ட ஆட்சியர் மற்றும் முதலமைச்சரின் தனிப்பிரிவு என அனைத்து நிலைகளிலும் மனு அளித்தும் இதுவரை எவ்வித நடவடிக்கையும் எடுக்கப்படவில்லை எனப் பொதுமக்கள் குற்றம் சாட்டுகின்றனர்.

"நிலம் இருந்தும் பயன்படுத்த முடியாத நிலை 'ஏட்டுச் சுரைக்காய் கறிக்கு உதவாத' கதையாக உள்ளது" என ஆதங்கப்படும் அப்பகுதி மக்கள், உடனடியாகப் பட்டா வழங்காவிட்டால் 2026 சட்டமன்றத் தேர்தலைப் புறக்கணிப்போம். ஆதார் மற்றும் ரேஷன் கார்டுகளை வட்டாட்சியர் அலுவலகத்தில் ஒப்படைப்போம் எனத் தீர்மானமாகத் தெரிவித்துள்ளனர்.

மக்கள் கருத்து

மக்கள் பதிவு செய்யும் கருத்துகள் தணிக்கையின்றி பிரசுரமாகும் வகையில் மென்பொருள் வடிவமைக்கப்பட்டுள்ளது. தொழில்நுட்ப குறைபாடுகள் காரணமாக கருத்துக்கள் பதிவாவதில் சிறிது காலதாமதம் ஏற்பட வாய்ப்புள்ளது. வாசகர்களின் கருத்துக்களுக்கு நிர்வாகம் பொறுப்பாக மாட்டார்கள். நாகரீகமற்ற மற்றும் பிறர் மனதை புண்படுத்தகூடிய கருத்துகளை / வார்த்தைகளைப் பயன்படுத்துவதை தவிர்க்கும்படி கேட்டுக்கொள்கிறோம்.

ஆங்கிலத்தில் தட்டச்சு செய்ய Ctrl+G -ஐ அழுத்தவும்.

பெயர்: கருத்து: