தூத்துக்குடியில் சட்டவிரோதமாக மது விற்றவர் கைது: 32 மது பாட்டில்கள், பணம் பறிமுதல்!

தூத்துக்குடி மேல சண்முகபுரம் பகுதியில் சட்டவிரோதமாக மதுபானம் விற்ற வாலிபரை தென்பாகம் காவல் நிலைய போலீசார் கைது செய்துள்ளனர்.

தூத்துக்குடி தென்பாகம் காவல் நிலைய போலீசார் இன்று காலை தங்களது எல்லைக்குட்பட்ட பகுதிகளில் தீவிர ரோந்துப் பணியில் ஈடுபட்டுக் கொண்டிருந்தனர். அப்போது, தூத்துக்குடி மேல சண்முகபுரம் ரோட்டில் இருசக்கர வாகனம் ஒன்றுடன் சந்தேகப்படும்படியாக நின்றிருந்த ஒரு நபரை போலீசார் இடைமறித்துச் சோதனை செய்தனர்.

அப்போது அவர், இருசக்கர வாகனத்தில் மறைத்து வைத்துச் சட்டவிரோதமாக மதுபான பாட்டில்களை விற்பனை செய்து கொண்டிருந்தது கண்டுபிடிக்கப்பட்டது. இதைத் தொடர்ந்து, அவரிடமிருந்த 32 மதுபான பாட்டில்கள், 1,010 ரூபாய் ரொக்கப் பணம், 2 மொபைல் போன்கள் மற்றும் கடத்தலுக்குப் பயன்படுத்தப்பட்ட இருசக்கர வாகனம் ஆகியவற்றை போலீசார் சம்பவ இடத்திலேயே பறிமுதல் செய்தனர்.

பறிமுதல் செய்யப்பட்ட பொருட்களுடன் அந்த நபரைத் தென்பாகம் காவல் நிலையத்திற்கு அழைத்துச் சென்று போலீசார் தீவிர விசாரணை நடத்தினார்கள். விசாரணையில், அவர் மேல சண்முகபுரம் வண்ணார் முதல் தெருவைச் சேர்ந்த முருகேசன் மகன் நடராஜன் (40) என்பதும், அரசு மதுபானக் கடைகளில் இருந்து மொத்தமாக மது பாட்டில்களை வாங்கி வந்து, சட்டவிரோதமாக அதிக விலைக்கு விற்பனை செய்ததும்  தெரியவந்தது. இதனைத் தொடர்ந்து, போலீசார் வழக்குப் பதிவு செய்து நடராஜனை கைது செய்தனர்.