வெல்டிங் கடை உரிமையாளர் தூக்கிட்டுத் தற்கொலை: தூத்துக்குடியில் பரிதாபம்!

தூத்துக்குடி தெர்மல் நகர் பகுதியில் வெல்டிங் கடை நடத்தி வந்த நபர், தனது கடையிலேயே தூக்கிட்டுத் தற்கொலை செய்து கொண்ட சம்பவம் அப்பகுதியில் பெரும் சோகத்தை ஏற்படுத்தியுள்ளது.

தூத்துக்குடி தெர்மல் நகர், கோவில்பிள்ளை நகரைச் சேர்ந்தவர் ஆறுமுகம் மகன் பூங்காவனம் (51). இவர் அந்தப் பகுதியில் வெல்டிங் கடை நடத்தி வந்தார். தொழில் நிமித்தமாக சென்னைக்குச் சென்றிருந்த பூங்காவனம், கடந்த 24-ம் தேதி காலை ஊர் திரும்பியுள்ளார். அன்று மாலை சுமார் 6:45 மணியளவில், பூங்காவனத்தின் நண்பர் கெவின் என்பவர், பூங்காவனத்தின் மகன் சிலம்பரசனைத் தொடர்பு கொண்டு உடனடியாகக் கடைக்கு வருமாறு தெரிவித்துள்ளார்.

தகவல் அறிந்து கடைக்கு விரைந்து சென்ற சிலம்பரசன், அங்கு தனது தந்தை கடையின் முன்புறம் இருந்த இரும்பு குழாயில் கயிற்றால் தூக்கிட்ட நிலையில் இருப்பதைக் கண்டு அதிர்ச்சியடைந்தார். உடனடியாக உறவினர்கள் உதவியுடன் பூங்காவனத்தை மீட்டு, 108 ஆம்புலன்ஸ் மூலம் தூத்துக்குடி அரசு மருத்துவக் கல்லூரி மருத்துவமனைக்குக் கொண்டு சென்றனர்.

அங்கு அவரைப் பரிசோதித்த மருத்துவர்கள், பூங்காவனம் ஏற்கனவே உயிரிழந்துவிட்டதாகத் தெரிவித்தனர். பூங்காவனம் ஏதற்காக தற்கொலை செய்துகொண்டார் என்பது தெரியவில்லை. இது குறித்து தெர்மல் நகர் காவல் நிலைய ஆய்வாளர் ஷோபா ஜென்ஸி வழக்குப் பதிவு செய்து விசாரணை நடத்தி வருகிறார்.