தூத்துக்குடி மாவட்டத்தில் மின்னணு வாக்குப்பதிவு இயந்திரங்கள் ஒதுக்கீடு - ஆட்சியர் இளம்பகவத் ஆய்வு

தூத்துக்குடி மாவட்டத்தில் மின்னணு வாக்குப்பதிவு இயந்திரங்களை தொகுதி வாரியாக அனுப்பும் பணிகளை மாவட்ட ஆட்சியர் க. இளம்பகவத் ஆய்வு செய்தார்.

தமிழக சட்டமன்றப் பொதுத்தேர்தல் வரும் ஏப்ரல் 23, 2026 அன்று நடைபெற உள்ளது. இதனை முன்னிட்டு, தூத்துக்குடி மாவட்டத்தில் சட்டமன்றத் தேர்தலில் பயன்படுத்தப்படவுள்ள மின்னணு வாக்குப்பதிவு இயந்திரங்கள், கட்டுப்பாட்டுக் கருவிகள் மற்றும் விவிபேட் இயந்திரங்கள் அங்கீகரிக்கப்பட்ட அரசியல் கட்சியினரின் முன்னிலையில், கணினி மூலம் ‘ரேண்டம்’ (Randomization) முறையில் இந்த ஒதுக்கீடு செய்யப்பட்டது.

மாவட்ட ஆட்சியர் அலுவலகத்தில் அமைந்துள்ள மின்னணு வாக்குப்பதிவு இயந்திரப் பாதுகாப்பு அறையிலிருந்து, இஎம்எஸ் 2.0 (EMS 2.0) என்ற மொபைல் செயலி மூலம் ஸ்கேன் செய்யப்பட்டு இயந்திரங்கள் சரிபார்க்கப்பட்டன. ஜிபிஎஸ் பொருத்தப்பட்ட மூடப்பட்ட கன்டெய்னர் லாரிகள் மூலம், தகுந்த காவல்துறை பாதுகாப்புடன் இந்த இயந்திரங்கள் அந்தந்தத் தொகுதி மையங்களுக்குக் கொண்டு செல்லப்பட உள்ளன. இப்பணிகளை மாவட்ட தேர்தல் அலுவலரும், மாவட்ட ஆட்சியருமான க. இளம்பகவத் இன்று நேரில் பார்வையிட்டு ஆய்வு செய்தார்.