ஓட்டப்பிடாரம் சட்டமன்றத் தொகுதி: திமுக சார்பில் போட்டியிட ஒன்றியச் செயலாளர் விருப்பமனு தாக்கல்!

தமிழக சட்டமன்றத் தேர்தலில் ஓட்டப்பிடாரம் தொகுதியில் திமுக சார்பில் போட்டியிட, ஓட்டப்பிடாரம் வடக்கு ஒன்றியச் செயலாளர் அ. இளையராஜா இன்று அண்ணா அறிவாலயத்தில் விருப்பமனு தாக்கல் செய்தார்.

தமிழக முதல்வர் மற்றும் திமுக தலைவர் மு.க. ஸ்டாலின் உத்தரவின்படி, தமிழகத்திலுள்ள 234 தொகுதிகளிலும் போட்டியிட விரும்புவோர் சென்னை அண்ணா அறிவாலயத்தில் விருப்பமனு அளிக்கலாம் என்று திமுக பொதுச்செயலாளரும் அமைச்சருமான துரைமுருகன் அறிவித்திருந்தார்.

இதனைத் தொடர்ந்து, விருப்பமனுத் தாக்கல் செய்யும் பணிகள் அண்ணா அறிவாலயத்தில் விறுவிறுப்பாக நடைபெற்று வருகின்றன. கனிமொழி எம்.பி மற்றும் அமைச்சர் அனிதா ராதாகிருஷ்ணனிடம் வாழ்த்து தூத்துக்குடி தெற்கு மாவட்ட திமுகவிற்குட்பட்ட ஓட்டப்பிடாரம் சட்டமன்றத் தொகுதியில் போட்டியிட விருப்பம் தெரிவித்து, ஓட்டப்பிடாரம் வடக்கு ஒன்றியச் செயலாளரும் முன்னாள் ஊராட்சி மன்றத் தலைவருமான அ. இளையராஜா விருப்பமனு அளித்தார்.

முன்னதாக, அவர் திமுக துணைப் பொதுச்செயலாளர் கனிமொழி கருணாநிதி எம்.பி. மற்றும் தெற்கு மாவட்ட திமுக செயலாளரும் மீன்வளம் - மீனவர் நலன் மற்றும் கால்நடை பராமரிப்புத் துறை அமைச்சருமான அனிதா ஆர். ராதாகிருஷ்ணன் ஆகியோரைச் சந்தித்து விருப்பமனு விண்ணப்பப் படிவத்தைக் காண்பித்து வாழ்த்துப் பெற்றார்.

மூத்த நிர்வாகிகளின் வாழ்த்துகளைப் பெற்ற பின்னர், அண்ணா அறிவாலயத்தில் தலைமைக் கழகத்தால் நியமிக்கப்பட்ட நிர்வாகிகளிடம் தனது விருப்பமனுவை அ. இளையராஜா சமர்ப்பித்தார். இந்த நிகழ்வின் போது, ஓட்டப்பிடாரம் தொகுதியைச் சேர்ந்த முக்கிய நிர்வாகிகள் மற்றும் கட்சித் தொண்டர்கள் உடனிருந்தனர்.