முதல்வர் பிறந்தநாள் விழா: 14 குழந்தைகளுக்குத் தங்க மோதிரம் வழங்கிய அமைச்சர் கீதா ஜீவன்!

தமிழக முதல்வரும், திமுக தலைவருமான  மு.க. ஸ்டாலின் அவர்களின் 73-வது பிறந்தநாளை முன்னிட்டு, தூத்துக்குடி வடக்கு மாவட்ட திமுக சார்பில் பல்வேறு நலத்திட்ட உதவிகள் வழங்கிக் கொண்டாடப்பட்டது.

இதன் முக்கிய நிகழ்வாக, தூத்துக்குடி அரசு மருத்துவமனையில் பிறந்த 14 குழந்தைகளுக்குத் தலா ஒரு தங்க மோதிரம் மற்றும் பச்சிளம் குழந்தைகளுக்கான அத்தியாவசியப் பொருட்களை, சமூக நலன் மற்றும் மகளிர் உரிமைத்துறை அமைச்சரும், வடக்கு மாவட்டச் செயலாளருமான கீதா ஜீவன் வழங்கினார். முன்னதாக, மாவட்ட முழுவதும் கேக் வெட்டியும், பட்டாசுகள் வெடித்தும், பொதுமக்களுக்கு இனிப்புகள் வழங்கியும் திமுகவினர் உற்சாகமாகக் கொண்டாடினர்.

இந்நிகழ்ச்சியில் மாநகரச் செயலாளர் எஸ்.ஆர். ஆனந்த சேகரன், மாவட்டத் துணை அமைப்பாளர் ராஜ்மோகன் செல்வின், மாவட்ட மருத்துவ அணித் தலைவர் டாக்டர் அருண்குமார், மாவட்ட மகளிர் அணி அமைப்பாளர் கவிதா மற்றும் முன்னாள் மேயர் கஸ்தூரி தங்கம் ஆகியோர் கலந்துகொண்டனர். மேலும், மாநகராட்சி கவுன்சிலர் இசக்கிராஜா, மாநகரச் சுற்றுச்சூழல் அணித் துணை அமைப்பாளர் மகேஸ்வரன் சிங் உள்ளிட்ட ஏராளமான கட்சி நிர்வாகிகள் மற்றும் தொண்டர்கள் திரளாகப் பங்கேற்றனர்.