முதல்வர் ஸ்டாலின் பிறந்த நாள்: திமுகவினருக்கு அமைச்சர் கீதா ஜீவன் வேண்டுகோள்!

தூத்துக்குடி வடக்கு மாவட்ட திமுக சார்பில் முதல்வரின் பிறந்த நாளை, ஏழை எளிய மக்களுக்கு நல உதவிகள் வழங்கி சிறப்பாகக் கொண்டாட வேண்டும் என்று மாவட்ட செயலாளரும் சமூக நலன் மற்றும் மகளிர் உரிமைத் துறை அமைச்சருமான பி.கீதா ஜீவன் வேண்டுகோள் விடுத்துள்ளார். 

திமுக தலைவரும் தமிழக முதல்வருமான மு.க. ஸ்டாலினின் 73-ஆவது பிறந்த நாள் விழா மார்ச் 1-ஆம் தேதி கொண்டாடப்பட உள்ளது. தமிழக முதல்வராகப் பொறுப்பேற்றது முதல் ‘எல்லோருக்கும் எல்லாம்’ என்ற உயரிய தத்துவத்தின் அடிப்படையில் பல்வேறு மக்கள் நலத் திட்டங்களைச் செயல்படுத்தி, மாநிலத்தின் வளர்ச்சிக்காகப் பாடுபட்டு வரும் முதல்வரின் பிறந்த நாளை, தூத்துக்குடி வடக்கு மாவட்ட திமுக சார்பில் சிறப்பாகக் கொண்டாட வேண்டும் என்று வடக்கு மாவட்ட திமுக செயலாளரும் சமூக நலன் மற்றும் மகளிர் உரிமைத் துறை அமைச்சருமான பி.கீதா ஜீவன் வேண்டுகோள் விடுத்துள்ளார். 

இதையொட்டி, மாநகர, நகர, ஒன்றிய, பகுதி, பேரூர், வட்ட மற்றும் கிளைக் கழக அமைப்புகள் சார்பில் கட்சியின் கொள்கைப் பாடல்களை ஒலிபரப்பியும், ஏழை எளிய மக்களுக்கு நல உதவிகள் வழங்கியும் எழுச்சியுடன் கொண்டாட வேண்டும் என அவர் கேட்டுக் கொண்டுள்ளார்.