தூத்துக்குடி புனித லூர்து அன்னை ஆலய பெருவிழா தேர்பவனி கோலாகலம்:திரளான பக்தர்கள் பங்கேற்பு!

தூத்துக்குடி லூர்தம்மாள்புரத்தில் அமைந்துள்ள புகழ்பெற்ற புனித லூர்து அன்னை ஆலயத்தின் ஆண்டுப் பெருவிழா தேர்பவனி விமர்சையாக நடைபெற்றது.

தூத்துக்குடி லூர்தம்மாள்புரத்தில் அமைந்துள்ள புகழ்பெற்ற புனித லூர்து அன்னை ஆலயத்தின் ஆண்டுப் பெருவிழா கடந்த பிப்ரவரி 6-ஆம் தேதி ஜெபமாலை, கொடியேற்றம் மற்றும் திருப்பலியுடன் பக்திப்பரவசமாகத் தொடங்கியது. விழாக் காலங்களில் தினமும் மாலையில் சிறப்புத் திருப்பலிகள் மற்றும் கலை நிகழ்ச்சிகள் நடைபெற்றன. திருவிழாவின் ஒன்பதாம் நாள் அன்று சிறப்பு மாலை ஆராதனை மற்றும் நற்கருணை ஆசீர்வாதம் நடைபெற்றது.

விழாவின் முக்கிய நிகழ்வான பத்தாம் நாள் சிகர நிகழ்ச்சி நேற்று நடைபெற்றது. கேரள மாநிலம் பாலக்காடு மறைமாவட்ட அருட்தந்தை சகாய வேந்தன் தலைமையில் ஆடம்பர கூட்டுத் திருப்பலி நடைபெற்றது. இதில் தூய தோமையார் கல்வி குழும அருட்தந்தை அமலன் தமியான், பங்குத்தந்தை செல்வன் பெர்னாண்டோ ஆகியோர் கலந்துகொண்டனர்.

இந்தச் சிறப்புத் திருப்பலியின் போது, ஏராளமான சிறுவர்-சிறுமியர்களுக்குப் புதுநன்மை (முதல் திருவிருந்து) வழங்கப்பட்டது. இதில் திரளான கிறிஸ்தவப் பெருமக்கள் கலந்துகொண்டு இறை ஆசீர் பெற்றனர்.

விழாவின் சிறப்பம்சமாக, லூர்தம்மாள்புரம் ஊர் மக்கள் சார்பில் புதிதாக உருவாக்கப்பட்ட திருத்தேரின் பவனி முதன்முறையாக நடைபெற்றது. பங்குத்தந்தை தேரை மந்திரித்துத் தொடங்கி வைக்க, பொதுமக்கள் தேரினை வடம்பிடித்து இழுத்துச் சென்றனர்.

ஆலய வளாகத்தில் தொடங்கிய இந்தத் தேர்பவனி, லூர்தம்மாள்புரம், மேட்டுப்பட்டி, எஸ்.எஸ். மாணிக்கபுரம் மற்றும் சென் மேரிஸ் காலனி வழியாகச் சென்று மீண்டும் ஆலயத்தை வந்தடைந்தது.

தேர்பவனியைத் தொடர்ந்து நேற்று மாலையில் ஜெபமாலை, நற்கருணை ஆசீர்வாதம் மற்றும் கொடியிறக்கம் நடைபெற்றது. அதனைத் தொடர்ந்து அன்பியங்களின் கலை நிகழ்ச்சிகள் கோலாகலமாக நடைபெற்றன. இந்த விழா ஏற்பாடுகளைப் பங்குத்தந்தை செல்வன் பெர்னாண்டோ தலைமையில், பங்குப் பணிக்குழுவினர், அன்பியங்கள், அருள் சகோதரிகள் மற்றும் இறைமக்கள் சிறப்பாகச் செய்திருந்தனர்.