அசல் ஆவணங்களைத் திரும்ப வழங்காத வங்கிக்கு ₹60,000 அபராதம் : நுகர்வோர் குறைதீர் ஆணையம் உத்தரவு

தொழில் கடனுக்காகப் பெற்ற அசல் ஆவணங்களைத் திரும்ப வழங்காத பொதுத்துறை வங்கிக்கு ₹60,000 அபராதம் விதித்து தூத்துக்குடி மாவட்ட நுகர்வோர் குறைதீர் ஆணையம் உத்தரவிட்டுள்ளது. 

தூத்துக்குடியைச் சார்ந்த சீனிவாச ராகவன் என்பவர் தூத்துக்குடியிலுள்ள ஒரு பொதுத்துறை வங்கியிடம் தொழில் கடன் பெற்றுள்ளார். அதற்காக சொத்துக்களின் அசல் ஆவணங்களை வங்கியில் ஒப்படைத்துள்ளார். இதன் பின்னர் கடன் தொகை முழுவதையும் செலுத்தி முடித்துள்ளார். இதனை அடுத்து அசல் ஆவணங்களை திரும்ப தருமாறு கேட்டுள்ளார். 

ஆனால் பொதுத்துறை வங்கி மனுதாரருக்கு அசல் ஆவணங்களை திரும்ப வழங்கவில்லை. இதனால் புகார்தாரர் அதிர்ச்சியும், தாங்க முடியாத வேதனையும் அடைந்து உடனடியாக வழக்கறிஞர் மூலம் நோட்டீஸ் அனுப்பியுள்ளார். ஆனால் இதன் பின்னரும் உரிய பதில் கிடைக்காததால் மன உளைச்சலுக்கு ஆளான நுகர்வோர் தூத்துக்குடி மாவட்ட நுகர்வோர் குறைதீர் ஆணையத்தில் வழக்கு தொடர்ந்தார்.

வழக்கை விசாரித்த தூத்துக்குடி மாவட்ட நுகர்வோர் குறைதீர் ஆணைய தலைவர் சக்கரவர்த்தி, உறுப்பினர்கள் ஆ.சங்கர், நமச்சிவாயம் ஆகியோர் சேவை குறைபாடு, பொருள் நஷ்டம் மற்றும் மன உளைச்சலுக்கு நஷ்ட ஈடு தொகை ரூபாய் 50,000,வழக்கு செலவுத் தொகை ரூபாய் 10,000 ஆக மொத்தம் ரூபாய் 60,000 ஐ வழங்க வேண்டும். இல்லையென்றால் அத் தொகையை செலுத்தும் தேதி வரை ஆண்டொன்றுக்கு 9% வட்டியுடன் வழங்க வேண்டும் என உத்திரவிட்டனர்.