மத்திய அரசின் திட்டங்களுக்கு ஸ்டிக்கர் ஒட்டும் திமுக அரசு: நயினார் நாகேந்திரன் கடும் விமர்சனம்!

மத்திய பட்ஜெட்டை முழுமையாக படிக்காமல் ஒன்றுமே இல்லை என்று கூறுகிறார்கள். வருகிற 2026 சட்டமன்ற தேர்தலில் திமுகவிற்கு ஒன்றுமே இல்லாமல் போய்விடும் என பாஜக மாநில தலைவர் நயினார் நாகேந்திரன் கூறினார். 

பாஜக மாநிலத் தலைவர் நயினார் நாகேந்திரன் தூத்துக்குடியில் செய்தியாளர்களை சந்தித்தார் அப்போது அவர் கூறுகையில், "தூத்துக்குடி விமான நிலையத்திற்கு 350 கோடி ரூபாயும், திருச்சி விமான நிலையத்திற்கு 650 கோடி ரூபாயும் மத்திய அரசு வழங்கியுள்ளது. பட்ஜெட்டுக்கு முன்பே 11 மருத்துவக் கல்லூரிகள் மற்றும் வந்தே பாரத் ரயில்கள் தமிழகத்திற்குக் கிடைத்துள்ளன. 

ரேஷன் கடைகளில் மத்திய அரசு இலவசமாக வழங்கும் பொருட்களுக்குத் தங்கள் ஸ்டிக்கரை ஒட்டி மாநில அரசு விளம்பரம் தேடிக் கொள்கிறது. பிரதமரின் வீடு கட்டும் திட்டத்தில் மத்திய அரசு 60% நிதி வழங்குகிறது என்பதை முதல்வர் மறைக்கிறார். வாக்குறுதி மீறல்களும் வரி உயர்வும்ஆட்சிக்கு வருவதற்கு முன்பு சொத்து வரி மற்றும் மின் கட்டணத்தை உயர்த்த மாட்டோம் என்று கூறிய திமுக, தற்போது அவற்றை 300%$ வரை உயர்த்தி மக்களை வஞ்சித்துள்ளது. 

பட்ஜெட்டைப் படிக்காமல் 'ஒன்றுமே இல்லை' என்று கூறும் முதல்வர், 2026 சட்டமன்றத் தேர்தலில் ஒன்றுமே இல்லாமல் போவார். தமிழகத்தில் சட்டம் ஒழுங்கு முற்றிலும் சீர்குலைந்துள்ளது. கிராமங்கள் தோறும் கஞ்சா விற்பனை தங்குதடையின்றி நடக்கிறது. திமுக ஆட்சியில் இதுவரை 32 லாக்-அப் மரணங்கள் நிகழ்ந்துள்ளன. பெண்களுக்கு எதிரான பாலியல் குற்றங்கள் அதிகரித்துள்ளன; இதில் திமுகவைச் சேர்ந்த 26 பேருக்குத் தொடர்புள்ளது.

தமிழக வெற்றிக் கழகத் தலைவர் விஜய்க்கு தமிழக கலாச்சாரம் தெரியவில்லை. மேடையில் நடனம் ஆடுவது ஒரு தலைவருக்கு அழகல்ல. கடந்த காலங்களில் பாஜகவுடன் கூட்டணி வைத்திருந்த திமுக, அப்போது பாஜகவின் கிளையாகச் செயல்பட்டதா? மத்திய அரசின் 12.20 லட்சம் கோடி மதிப்பிலான பட்ஜெட் இளைஞர்களுக்கான வேலைவாய்ப்பை உறுதி செய்யும் எனத் தெரிவித்தார்.