அடமானவைத்த அசல் ஆவணங்களை தொலைத்த பொதுத்துறை வங்கி ரூ.6 இலட்சம் வழங்க உத்தரவு!

அடமான கடனை திருப்பி செலுத்திய பிறகும் அசல் ஆவணங்களை தொலைத்த பொதுத்துறை வங்கி ரூ.6 இலட்சத்து 10 ஆயிரம் வழங்க வேண்டுமென தூத்துக்குடி மாவட்ட நுகர்வோர் குறைதீர் ஆணையம் உத்தரவிட்டது.

தூத்துக்குடி மாவட்டம் கோவில்பட்டி கிளவிப்பட்டியைச் சார்ந்த விஞ்ஞானி பன்னீர்செல்வம் என்பவர் மத்திய அரசின் விஞ்ஞானம் மற்றும் தொழில்நுட்ப துறையில் விஞ்ஞானியாகப் பணியாற்றி வருகின்றார். இவர் திருநெல்வேலியிலுள்ள ஒரு பொதுத்துறை வங்கியில் வீடு கட்டுவதற்காக கடன் பெற்றுள்ளார். அதற்காக தனது சொத்துக்களின் அசல் ஆவணங்களை வங்கியில் கொடுத்துள்ளார்.

இதற்கிடையில் அவர் விஞ்ஞான ஆராய்ச்சிக்காக அண்டார்டிகா சென்றதால் கடன் தவணைகளை சரியான நேரத்தில் செலுத்த முடியாத நிலை ஏற்பட்டுள்ளது. ஆனால் வங்கி பாக்கியுள்ள வீட்டுக் கடனை உடனே செலுத்த வேண்டுமென புகார்தாரரின் மனைவியிடம் தொடர்ந்து வற்புறுத்தி வந்துள்ளனர். இதனால் வங்கிக் கடன் முழுவதையும் இவர் செலுத்தி விட்டார். ஆகவே தனது சொத்துக்களின் அசல் ஆவணங்களை திரும்ப தருமாறு கேட்டுள்ளார். 

ஆனால் வங்கி அசல் ஆவணங்களை மனுதாரருக்கு வழங்க மறுத்துள்ளது. விசாரித்ததில் தொலைந்து விட்டதாக தெரிய வந்துள்ளது. இதனால் மன உளைச்சலுக்கு ஆளான நுகர்வோர் வழக்கறிஞர் மூலம் நோட்டீஸ் அனுப்பியுள்ளார். ஆனால் அதன் பின்னரும் உரிய பதில் கிடைக்காததால் தூத்துக்குடி மாவட்ட நுகர்வோர் குறைதீர் ஆணையத்தில் வழக்கு தொடர்ந்தார்.

வழக்கை விசாரித்த தூத்துக்குடி மாவட்ட நுகர்வோர் குறைதீர் ஆணைய தலைவர் திருநீல பிரசாத், உறுப்பினர்கள் ஆ.சங்கர், நமச்சிவாயம் ஆகியோர் புகார்தாரருக்கு பாத்தியப்பட்ட அசல் ஆவணங்களின் நகல்களை அரசிடமிருந்து வங்கியின் செலவில் பெற்று இரு மாதங்களுக்குள் ஒப்படைக்க வேண்டுமென்றும, வங்கியின் சேவை குறைபாட்டினை சுட்டிக் காட்டி பாதிக்கப்பட்ட நுகர்வோருக்கு சேவை குறைபாடுக்கு ரூபாய் 5 இலட்சம் மற்றும் மன உளைச்சலுக்கு நஷ்டஈடு தொகை ரூபாய் 1 இலட்சம், வழக்கு செலவுத் தொகை ரூபாய் 10,000 ஆக மொத்தம் 6 இலட்சத்து 10 ஆயிரம் ரூபாயை இரு மாத காலத்திற்குள் வழங்க வேண்டும் இல்லையென்றால் அத்தொகையை செலுத்தும் தேதி வரை ஆண்டொன்றுக்கு 9 சதவீதம் வட்டியுடன் வழங்க வேண்டும் என உத்தரவிட்டனர்.