தூத்துக்குடி போலீஸ்காரர் ஆற்றில் மூழ்கி பலி!

ஆற்றில்  குளிக்க சென்றபோது ஆற்றில் தவறி விழுந்த தூத்துக்குடி போலீஸ்காரர் நீரில் மூழ்கி பரிதாபமாக உயிரிழந்தார்.

தூத்துக்குடி மாவட்டம் ஓட்டப்பிடாரம் பசுவந்தனை பகுதியை சேர்ந்த செந்தூர்பாண்டி என்பவரது மகன் கோவிந்தராஜ் (25). போலீஸ்காரரான இவர், நீலகிரி மாவட்டம் பந்தலூர் அருகே சோலாடி போலீஸ் சோதனைச்சாவடியில் பணிபுரிந்து வந்தார். அவர் தமிழ்நாடு சிறப்பு காவல்படை கோவை பட்டாலியன் படையில் இருந்தார்.

நேற்று காலை கோவிந்தராஜ் சோதனைச்சாவடி அருகே உள்ள சோலாடி ஆற்றில் குளிக்க சென்றார். அங்கு துணி துவைத்து கொண்டிருந்த போது, அவர் தவறி ஆற்றுக்குள் விழுந்து உள்ளார். இதை பார்த்த அப்பகுதியை சேர்ந்தவர்கள் சோதனைச்சாவடியில் பணியில் இருந்த போலீசாரிடம் கூறினர். அவர்கள் சம்பவ இடத்துக்கு விரைந்து சென்று பார்த்த போது, கோவிந்தராஜ் நீரில் மூழ்கியது தெரியவந்தது.

உடனடியாக அவரை மீட்டு பந்தலூர் அரசு மருத்துவமனைக்கு சிகிச்சைக்காக கொண்டு சென்றனர். அங்கு பரிசோதனை செய்த டாக்டர்கள், கோவிந்தராஜ் ஏற்கனவே இறந்து விட்டதாக தெரிவித்தனர். பின்னர் சேரம்பாடி போலீசார் உடலை கைப்பற்றி பிரேத பரிசோதனைக்காக ஊட்டி அரசு மருத்துவமனைக்கு அனுப்பி வைத்தனர். இந்த சம்பவம் குறித்து சேரம்பாடி போலீசார் வழக்குப்பதிவு செய்து விசாரணை நடத்தி வருகின்றனர். ஆற்றில் மூழ்கி போலீஸ்காரர் இறந்த சம்பவம் அப்பகுதியில் சோகத்தை ஏற்படுத்தியது.