எரிபொருள் விலை உயர்வு எதிரொலி: பாகிஸ்தானில் தினசரி 2 மணி நேர மின்வெட்டு அமல்!

ஈரான் போர் பதற்றம் காரணமாக உலகளவில் எரிபொருள் விலை உயர்ந்துள்ள சூழலில், மின்சாரக் கட்டண உயர்வைத் தவிர்க்க பாகிஸ்தான் அரசு நாடு தழுவிய மின்வெட்டை அறிவித்துள்ளது.

பாகிஸ்தான் எரிசக்தி அமைச்சகம் வெளியிட்டுள்ள அறிவிப்பின்படி, நாடு முழுவதும் தினமும் மாலை 5 மணி முதல் நள்ளிரவு 1 மணி வரையிலான காலகட்டத்தில், சுமார் இரண்டேகால் (2.15) மணி நேரம் மின்சாரம் நிறுத்தப்படும். இந்தத் திட்டமிட்ட மின்வெட்டு நடவடிக்கை உடனடியாக அமலுக்கு வருவதாகத் தெரிவிக்கப்பட்டுள்ளது.

விலக்கு அளிக்கப்பட்ட நகரங்கள்

நாட்டின் முக்கியப் பொருளாதார மையங்களான கராச்சி மற்றும் ஐதராபாத் ஆகிய நகரங்களுக்கு மட்டும் இந்த மின்வெட்டு நடைமுறையிலிருந்து தற்காலிகமாக விலக்கு அளிக்கப்பட்டுள்ளது. மற்ற அனைத்துப் பகுதிகளிலும் இந்த அறிவிப்பு கட்டாயமாக்கப்பட்டுள்ளது.

மின்வெட்டுக்கான காரணங்கள் குறித்து அந்நாட்டு அரசு தரப்பில் கூறப்பட்டுள்ளதாவது: சர்வதேச சந்தையில் கச்சா எண்ணெய் மற்றும் எரிபொருட்களின் விலை உயர்ந்துள்ளதால், மின் உற்பத்திச் செலவு அதிகரித்துள்ளது. இந்த மின்வெட்டு நடவடிக்கையை மேற்கொள்வதன் மூலம், மின்சாரக் கட்டணம் யூனிட்டிற்கு 6 ரூபாய் வரை உயர்வது தவிர்க்கப்படும். இறக்குமதி செய்யப்படும் எரிபொருட்களுக்கான அந்நியச் செலாவணி கையிருப்பைக் குறைக்கவும் இந்த நடவடிக்கை உதவும்.

ஏற்கனவே கடும் பொருளாதார நெருக்கடியில் சிக்கியுள்ள பாகிஸ்தான் மக்களுக்கு, இந்த அறிவிப்பு பேரிடியாக அமைந்துள்ளது. குறிப்பாக மாலை நேரங்களில் மின்சாரம் நிறுத்தப்படுவதால் மாணவர்கள், சிறு வணிகர்கள் மற்றும் பொதுமக்கள் கடும் சிரமத்திற்கு உள்ளாகியுள்ளனர். அரசின் இந்த முடிவிற்குப் பல்வேறு தரப்பிலிருந்தும் கண்டனங்கள் எழுந்துள்ளன.