ஈரானில் பிரபல பாடகிக்கு 74 சவுக்கடிகள் தண்டனை : மனித உரிமை அமைப்புகள் கண்டனம்!

ஈரானில் கடந்த 1979ஆம் ஆண்டு ஏற்பட்ட இஸ்லாமியப் புரட்சிக்குப் பிறகு, பெண்கள் பொது இடங்களில் கடுமையான ஆடை விதிமுறைகளைப் பின்பற்றவும், தனியாகப் பாடுவதற்கும் தடை விதித்துச் சட்டங்கள் இயற்றப்பட்டு நடைமுறையில் உள்ளன. இத்தகைய கடுமையான சட்ட விதிகளின் பின்னணியில், நாட்டின் ஆடை கட்டுப்பாட்டை மீறியதாகப் புகழ்பெற்ற பெண் பாடகி ஒருவருக்கு அந்நாட்டு நீதிமன்றம் சவுக்கடி மற்றும் கலைத் தடை விதித்துத் தீர்ப்பளித்துள்ளது உலக அளவில் பெரும் பரபரப்பை ஏற்படுத்தியுள்ளது.

கடந்த 2024 டிசம்பர் மாதத்தில் நடைபெற்ற ஒரு பொது நிகழ்ச்சியில், ஈரானின் பிரபல பெண் பாடகியான பரஸ்தூ அஹ்மதி, பிற இசைக்கலைஞர்களுடன் இணைந்து அந்நாட்டின் தேசபக்தி பாடல் ஒன்றை நேரலையில் பாடினார். மேலும், இந்த இசை நிகழ்ச்சியின் முழு நீளக் காணொளி யூடியூப் தளத்திலும் அதிகாரப்பூர்வமாக ஒளிபரப்பப்பட்டது. இந்த வீடியோ சமூக ஊடகங்களில் வைரலாகப் பரவியதை அடுத்து, பாடகி அஹ்மதி மீது ஈரானியப் பாதுகாப்பு அதிகாரிகள் சட்டப்பூர்வமாக வழக்குப் பதிவு செய்து நீதிமன்றத்தில் ஆஜர்படுத்தினர்.

இந்த வழக்கை விசாரித்த ஈரானின் கோம் மாகாண குற்றவியல் நீதிமன்றம், இணையத்தில் வெளியான வீடியோவில் பாடகியின் தலை, கழுத்து மற்றும் தோள்கள் வெளிப்படையாகத் தெரிந்ததைச் சுட்டிக்காட்டியது. நாட்டில் நடைமுறையில் உள்ள கட்டாய ஹிஜாப் சட்டத்தை (Mandatory Hijab Law) மீறி அவர் நிகழ்ச்சி நடத்தியதாகக் குற்றம்சாட்டிய நீதிமன்றம், பாடகி பரஸ்தூ அஹ்மதிக்கு 74 சவுக்கடிகள் அடிக்குமாறு அதிரடி தண்டனை விதித்தது. மேலும், அவர் அடுத்த இரண்டு ஆண்டுகளுக்கு எந்தவொரு கலை சார்ந்த நடவடிக்கைகளிலும் ஈடுபடக் கூடாது என்றும், வெளிநாடுகளுக்குப் பயணம் செய்யக் கூடாது என்றும் தடை விதித்து உத்தரவிட்டுள்ளது.

ஈரான் நீதிமன்றத்தின் இந்த மனிதாபிமானமற்ற உத்தரவிற்குப் பல்வேறு சர்வதேச மனித உரிமைகள் பிரிவினரும், சமூக ஆர்வலர்களும் தங்களது கடுமையான கண்டனங்களைப் பதிவு செய்து வருகின்றனர். இதுகுறித்து ஈரானிய நடிகர் செத்தாரே மலேகி கூறுகையில், "பரஸ்தூ அஹ்மதியின் வீடியோவைப் பார்த்தபோது, அது எனக்குள் இருந்த ஒடுக்கப்பட்ட எதிர்ப்பு உணர்வை மீண்டும் தூண்டியது. அவரை நினைத்து நான் மிகுந்த பெருமை அடைகிறேன்" என்றார்.

அதேபோல், மனித உரிமை பரப்புரை இயக்குநர் பஹாரி கந்தேஹரி தனது கண்டன அறிக்கையில், "ஈரான் குற்றவியல் சட்டத்தின் எந்தவொரு பிரிவின் கீழும் பெண்கள் பாடுவதோ, இசை நிகழ்த்துவதோ, கலைப் படைப்புகளை உருவாக்குவதோ குற்றமாகக் கருதப்படவில்லை. ஆகையால், ஒரு கலைச் செயல்பாட்டை ஆபாசமான உள்ளடக்கத்தை உருவாக்குதல் அல்லது பரப்புதல் என நீதிமன்றம் தவறாகப் பொருள் கொண்டு தண்டிப்பதை ஏற்க முடியாது” எனத் தெரிவித்துள்ளார்.