பைக் மீது லாரி மோதிய விபத்தில் இளம்பெண் உட்பட 2 பேர் பலி: தூத்துக்குடியில் பரிதாபம்!

தூத்துக்குடியில் பைக் மீது லாரி மோதிய விபத்தில் திருமணம் நிச்சயிக்கப்பட்ட இளம்பெண் உட்பட 2பேர் பரிதாபமாக உயிரிழந்தனர்.

தூத்துக்குடி அமுதா நகர் பகுதியைச் சேர்ந்த ராஜன் மகள் முத்துச்செல்வி என்ற முத்துமாரி (24). இவருக்கு திருமணம் நிச்சயம் செய்யப்பட்டு, பிப்.15ஆம் தேதி திருமணம் நடைபெற இருந்தது. இந்நிலையில் முத்துமாரி, கல்லூரியில் படித்து வந்த தன்னுடைய உறவினரான மணியாச்சி ஒட்டநத்தம் பகுதியைச் சேர்ந்த சிவா மகன் கலைச்செல்வன் (22) என்பவருடன், தூத்துக்குடி துறைமுகம் பகுதியில் வேலை செய்யும் தனது தந்தையை பார்க்க பைக்கில் நேற்று சென்றாராம்.

அப்போது, துறைமுகத்திலிருந்து உரம் ஏற்றி வந்த டிப்பர் லாரி, அவர்களது பைக் மீது மோதியதாம். இதில், இருவரும் சம்பவ இடத்திலேயே உயிரிழந்தனர். இத்தகவலறிந்த தெர்மல் நகர் போலீசார், அவர்களது சடலங்களை கைப்பற்றி பிரேத பரிசோதனைக்காக தூத்துக்குடி அரசு மருத்துவமனைக்கு அனுப்பி வைத்தனர். மேலும், வழக்குப் பதிந்து விசாரித்து வருகின்றனர்.