தலைமைச் செயலகத்தில் ஸ்டாலின் படங்கள் அகற்றம்; புதிய அரசு அமைய ஏற்பாடு தீவிரம்!

முதல்வர் பதவியை மு.க. ஸ்டாலின் ராஜினாமா செய்ததையடுத்து, தலைமைச் செயலகத்தில் உள்ள அவரது அலுவலகம் மற்றும் அமைச்சர்களின் அறைகளில் இருந்த புகைப்படங்கள், பெயர்ப் பலகைகள் மற்றும் அரசு சார்ந்த பொருட்கள் அகற்றப்பட்டன. குறிப்பாக, முன்னாள் முதல்வர் கருணாநிதியின் புகைப்படத்திற்கு அருகில் இருந்த மு.க. ஸ்டாலினின் புகைப்படம், அவரது பெயரிடப்பட்ட நாட்காட்டிகள் மற்றும் இதர அடையாளங்கள் அதிகாரிகளால் அப்புறப்படுத்தப்பட்டன.

தவெக-வின் வரலாற்று வெற்றி

கடந்த ஏப்ரல் 23-ஆம் தேதி நடைபெற்ற சட்டமன்றத் தேர்தலில் பதிவான வாக்குகள் நேற்று எண்ணப்பட்டன. இதில் நடிகர் விஜய்யின் தமிழக வெற்றிக்கழகம் (தவெக) 108 இடங்களைக் கைப்பற்றி தனிப்பெரும் கட்சியாக உருவெடுத்தது. சுமார் 16 லட்சம் வாக்குகள் வித்தியாசத்தில், திமுக-வை விட 3 சதவீத கூடுதல் வாக்குகளைப் பெற்று தவெக இந்த வெற்றியைப் பதிவு செய்துள்ளது.

அதேநேரம், திமுக கூட்டணி 74 இடங்களைப் பெற்று இரண்டாம் இடத்தையும், அதிமுக கூட்டணி 53 இடங்களையும் பிடித்துள்ளன. இந்தத் தேர்தலில் தமிழக அரசியலில் பெரும் அதிர்ச்சியாக, முதல்வர் மு.க. ஸ்டாலின் தான் போட்டியிட்ட கொளத்தூர் தொகுதியில் தவெக வேட்பாளரிடம் தோல்வியைத் தழுவினார். 

அவரைப் போலவே மூத்த அமைச்சர்களான: துரைமுருகன் மா. சுப்பிரமணியன் மூர்த்தி பி.டி.ஆர். பழனிவேல் தியாகராஜன் தா.மோ. அன்பரசன் சா.மு. நாசர் உள்ளிட்ட பல முக்கிய அமைச்சர்களும் தோல்வியடைந்துள்ளனர். இருப்பினும், உதயநிதி ஸ்டாலின் சேப்பாக்கம் தொகுதியில் வெற்றி பெற்றுள்ளார். திமுக தனித்து 60 இடங்களில் வெற்றி பெற்று எதிர்க்கட்சி அந்தஸ்தைப் பெற்றுள்ளது.

தமிழகத்தில் ஆட்சி அமைக்க 118 இடங்கள் தேவை என்ற நிலையில், 108 இடங்களை வைத்துள்ள தவெக தனிப்பெரும் கட்சியாக ஆளுநரிடம் ஆட்சி அமைக்க உரிமை கோரியுள்ளது. மீதமுள்ள இடங்களுக்கு அதிமுக ஆதரவு அளிக்குமா என்பது குறித்த எதிர்பார்ப்பு அதிகரித்துள்ளது. அதிமுக ஆதரவு அளிக்க வாய்ப்புள்ளதாகத் தகவல்கள் கசிந்தாலும், அதிகாரப்பூர்வ அறிவிப்பு இன்னும் வெளியாகவில்லை.

விஜய் முதல்வராகப் பதவியேற்பது உறுதியாகியுள்ள நிலையில், தலைமைச் செயலகத்தில் புதிய அரசுக்கான ஏற்பாடுகள் தயார் நிலையில் உள்ளன. முதல்வருக்கான அதிகாரப்பூர்வ வாகனங்கள் (Convoy) ஏற்கனவே விஜய்யின் இல்லத்திற்குச் சென்றுள்ளன. அவருக்கு உரிய பாதுகாப்பு ஏற்பாடுகளும் பலப்படுத்தப்பட்டுள்ளன. அடுத்த சில நாட்களில் தமிழகத்தின் புதிய முதல்வராக விஜய் பொறுப்பேற்பார் என எதிர்பார்க்கப்படுகிறது.