குளச்சலில் விசைப்படகு மீனவர்கள் வேலை நிறுத்தம்!

தூத்துக்குடி மீனவர்கள் சிறைபிடித்த படகுகளையும் மீனவர்களையும் விடுவிக்க கோரி குளச்சலில் விசைப்படகு மீனவர்கள் வேலை நிறுத்த போராட்டத்தில் ஈடுபட்டுள்ளனர். 

கன்னியாகுமரி மாவட்டம் குளச்சல் கடல் பகுதியில் சுமார் 300 க்கும் மேற்பட்ட விசைப்படகுகளும், 1000 க்கும் மேற்பட்ட பைபர் வள்ளம் கட்டுமரங்களும் மீன் பிடித்தொழில் செய்து வருகின்றன. கடந்த வாரம் விசைப்படகுகள் குளச்சல் மீன் பிடித்துறைமுகத்திலிருந்து வழக்கம்போல் ஆழ்கடல் பகுதிக்கு மீன் பிடிக்க சென்றன. 

கடந்த 19 ம் தேதி தூத்துக்குடி கடல் பகுதியில் மீன் பிடித்ததாக குளச்சல் 5 விசைப்படகுகளில் இருந்த 73 மீனவர்களையும் மற்றும் ஒரு கேரள விசைப்படகையும், அதிலிருந்த 13 மீனவர்களையும் தூத்துக்குடி மீனவர்கள் சிறைப்பிடித்து தூத்துக்குடி மீன் பிடித்துறைமுகத்திற்கு அழைத்து சென்றனர். தகவலறிந்த குமரி மாவட்ட விசைப்படகு மீன் பிடிப்பவர் நலச்சங்கம்

(குளச்சல்)நிர்வாகிகள் விரைந்து தூத்துக்குடி சென்றனர். அங்கு மீன் வளத்துறை அதிகாரிகள் மற்றும் போலீசார் தூத்துக்குடி மீனவர்களுடன் பேச்சுவார்த்தை நடத்தினர். இதில் சுமூக முடிவு  ஏற்படவில்லை. தொடர்ந்து 3 நாட்கள் பேச்சு வார்த்தை நடத்தியும் முடிவு ஏற்படவில்லை. இதனை கண்டித்து இன்று குளச்சல் விசைப்படகினர் மற்றும் பைபர் வள்ளம், கட்டுமர மீனவர்கள் திடீர் வேலை நிறுத்தத்தில் ஈடுப்பட்டுள்ளனர். வேலை நிறுத்தத்தில் ஈடுப்பட்டுள்ள குளச்சல் மீனவர்கள் தொடர்ந்து துறைமுகத்தில் தர்ணா நடத்தி வருகின்றனர்.