பெங்களூரு எக்ஸ்பிரஸ் ரயில் நடுவழியில் நிறுத்தம்: ஊழியர்கள் சோதனையால் பயணிகள் அச்சம்

நாகர்கோவில் நோக்கி வந்த பெங்களூரு எக்ஸ்பிரஸ் ரயில் நடுவழியில் நிறுத்தப்பட்டது. மேலும் ரயில்வே ஊழியர்கள் ரயிலில் சோதனையிட்டதால் பயணிகள் அச்சமடைந்தனர்.

பெங்களூருவில் இருந்து நெல்லை வழியாக நாகர்கோவிலுக்கு புறப்பட்ட பெங்களூரு எக்ஸ்பிரஸ் நேற்று வள்ளியூர் ரயில் நிலையத்திற்கு வந்தது. அங்கு பயணிகளை இறக்கி விட்டு வள்ளியூர் ரயில் நிலையத்தில் இருந்து புறப்பட்டு சென்றபோது ரயிலில் உள்ள ஏதோ ஒரு பெட்டியில் உள்ள சக்கரங்களில் இருந்து வித்தியாசமான சத்தம் கேட்டது. இதனை ரயில்வே ஊழியர்கள் உணர்ந்தனர்.

உடனே இதுகுறித்து வடக்கு பணகுடி ரயில் நிலையத்துக்கும், பெங்களூரு எக்ஸ்பிரஸ் என்ஜின் டிரைவர் மற்றும் கார்டு ஆகியோருக்கும் தகவல் கொடுத்தனர். இதையடுத்து பெங்களூரு ரயிலுக்கு வடக்கு பணகுடி ரயில் நிலையத்தில் சிக்னல் வழங்கப்படவில்லை. இதனால் அந்த ரயில் நிலையத்தில் பெங்களூரு எக்ஸ்பிரஸ் நடுவழியில் நிறுத்தப்பட்டது.

இதையடுத்து ரயிலின் கார்டு தனது பெட்டியை விட்டு இறங்கி, ஒவ்வொரு பெட்டியாக நடந்து சென்று சோதனை செய்தபடி சென்றார். மேலும் பணகுடி ரயில் நிலைய ஊழியர்களும் ரயில் பெட்டிகளில் சக்கரங்கள் இருக்கும் பகுதியை பார்வையிட்டபடி சென்றார்கள்.

இதற்கிடையே நிறுத்தம் இல்லாத ரயில் நிலையத்தில் எதற்காக ரயில் நிறுத்தப்பட்டுள்ளது என்ற கேள்வி பயணிகள் மத்தியில் எழுந்தது. மேலும் ரயில்வே ஊழியர்கள் சோதனை செய்ததை பார்த்து பயணிகள் பதற்றம் அடைந்து என்னாச்சு, ஏதாச்சு என ரயில்வே ஊழியர்களிடம் கேட்டனர்.

ஆனால், அவர்கள் அதற்கு சரியான பதிலை கூறவில்லை. இதனால் பயணிகள் மத்தியில் மேலும் பதற்றம் அதிகரித்தது. சோதனை முடிந்த போது ரயில் சக்கரங்களில் பிரச்சினை இல்லை என்பதை ரயில்வே ஊழியர்கள் அறிந்தனர். இதனை தொடர்ந்து மீண்டும் ரயில் அங்கிருந்து புறப்பட்டது. அதன்பிறகே பயணிகள் நிம்மதி அடைந்தனர். இந்த சம்பவத்தால் 15 நிமிடம் பெங்களூரு எக்ஸ்பிரஸ் நடுவழியில் நிறுத்தப்பட்டது. இதனால் வழக்கமான நேரத்தை விட நாகர்கோவில் ரயில் நிலையத்திற்கும் 10 நிமிடம் ரயில் தாமதமாக வந்தது.