குடும்பப் பிரச்சினை: வாலிபர் தூக்கிட்டுத் தற்கொலை

ஆழ்வார்திருநகரி அருகே குடும்பப் பிரச்சினை காரணமாக வாலிபர் ஒருவர் தூக்கிட்டுத் தற்கொலை செய்து கொண்ட சம்பவம் குறித்து போலீசார் விசாரணை நடத்தி வருகின்றனர்.

தூத்துக்குடி மாவட்டம், ஆழ்வார்திருநகரி அருகே செம்பூர், சந்தன மாரியம்மன் கோவில் தெருவைச் சேர்ந்தவர் காளி ரத்தினம் மகன் ராஜ் (35). இவருக்குக் கடந்த சில நாட்களாகக் குடும்பப் பிரச்சினை இருந்து வந்ததாகக் கூறப்படுகிறது. இதனால் மனமுடைந்த ராஜ், நேற்று இரவு தனது வீட்டின் வெளியே இருந்த முருங்கை மரத்தில் கயிற்றால் தூக்கிட்டுத் தற்கொலைக்கு முயன்றுள்ளார்.

இதைப் பார்த்து அதிர்ச்சியடைந்த குடும்பத்தினர் மற்றும் அக்கம் பக்கத்தினர், அவரை உடனடியாக மீட்டு சிகிச்சைக்காக ஸ்ரீவைகுண்டம் அரசு மருத்துவமனைக்குக் கொண்டு சென்றனர். அங்கு அவரைப் பரிசோதித்த மருத்துவ அதிகாரி, ராஜ் ஏற்கனவே இறந்துவிட்டதாகத் தெரிவித்தார். இதுகுறித்து ஆழ்வார்திருநகரி காவல் நிலைய உதவி ஆய்வாளர் பாலன் வழக்குப் பதிவு செய்து, தற்கொலைக்கான காரணம் குறித்து விசாரணை மேற்கொண்டு வருகிறார்.