வாலிபரை செங்கலால் தாக்கி கொலை மிரட்டல் : இளஞ்சிறார் உள்பட 2பேர் கைது!

கோவில்பட்டியில் வாலிபரை செங்கலால் தாக்கி, கொலை மிரட்டல் விடுத்த வழக்கில் இளஞ்சிறார் உள்பட 2பேரை போலீசார் கைது செய்துள்ளனர்.

தூத்துக்குடி மாவட்டம் கோவில்பட்டி வடக்குத் திட்டங்குளம் பகுதியைச் சேர்ந்தவர் பரமசிவன். இவரது மகன் பால விக்னேஸ்வரன் (23). இவர் கட்டிடத் தொழிலாளியாக வேலை பார்த்து வருகிறார். கடந்த ஜூன் 9-ஆம் தேதி அன்று இரவு நேரத்தில், பால விக்னேஸ்வரன் தனது சகோதரரைத் தேடிக்கொண்டு அந்தப் பகுதியில் நடந்து சென்று கொண்டிருந்தார்.

அப்போது அங்குள்ள கருப்பசாமி கோவில் அருகே பால விக்னேஸ்வரனின் நெருங்கிய உறவினர் ஒருவரிடம் 3 பேர் கொண்ட மர்மக் கும்பல் வம்பு இழுத்து, கடுமையான தகராறில் ஈடுபட்டுக் கொண்டிருந்ததைக் கண்டு அதிர்ச்சியடைந்தார். உடனே பால விக்னேஸ்வரன் அங்கு விரைந்து சென்று, தனது உறவினரிடம் தகராறு செய்த அந்த 3 பேர் கொண்ட கும்பலை நியாயப்படி தட்டிக்கேட்டுள்ளார்.

இதனால் ஆத்திரமடைந்த அந்த 3 பேர் கொண்ட கும்பல், பால விக்னேஸ்வரனைப் பார்த்து அவதூறாகப் பேசி, அருகில் கிடந்த செங்கலை எடுத்து தலை மற்றும் உடலில் தாக்கி, கொலை மிரட்டல் விடுத்துவிட்டு அங்கிருந்து தப்பியோடியது. இத்தாக்குதலில் படுகாயமடைந்த பால விக்னேஸ்வரனை அங்கிருந்தவர்கள் மீட்டு, உடனடியாகக் கோவில்பட்டி அரசு மருத்துவமனையில் சிகிச்சைக்காக அனுமதித்தனர். 

இச்சம்பவம் குறித்து புகாரின் பேரில் கிழக்குக் காவல் நிலைய போலீசார் வழக்குப் பதிவு செய்து, இத்தாக்குதல் சம்பவத்தில் ஈடுபட்ட 17 வயது இளம்சிறார் ஒருவரையும், அவருடன் துணையாக இருந்த வடக்குத் திட்டங்குளத்தைச் சேர்ந்த தங்கப்பாண்டி மகன் சரவணபாண்டி (22) ஆகிய 2 பேரையும் காவல்துறையினர் கைது செய்துள்ளனர். இக்குற்றச் சம்பவத்தில் தொடர்புடைய தலைமறைவாக உள்ள மற்றொரு நபரை போலீசார் தேடி வருகின்றனர்.