தூத்துக்குடியில் திடீர் மழை: பொதுமக்கள் மகிழ்ச்சி!

தூத்துக்குடி மாவட்டத்தில் ஜூன் மாதத் தொடக்கத்தில் இருந்தே வெயிலின் அளவு சதமடித்துப் பொதுமக்களைக் கடுமையாக வாட்டி வதைத்து வந்தது. கத்திரி வெயில் முடிந்த பின்னரும் காற்றில் ஈரப்பதம் குறைந்து, அனல் காற்று வீசியதால் பொதுமக்கள் பகல் நேரங்களில் வெளியில் நடமாட முடியாமல் பெரிதும் அவதிப்பட்டு வந்தனர். இந்நிலையில், இன்று காலை முதலே வானில் வழக்கமான வெயில் காணப்பட்டாலும், மதியத்திற்கு மேல் வளிமண்டல மேலடுக்குச் சுழற்சி காரணமாக வானிலை திடீரென அதிரடி மாற்றம் கண்டது.

இன்று பிற்பகல் 1.20 மணியளவில் மாநகரின் வான்பரப்பில் திடீரெனக் கருகருவெனக் கார்மேகங்கள் சூழ்ந்து இருள் சூழ்ந்தது போல் காட்சியளித்தது. அதனைத் தொடர்ந்து, இடி-மின்னலுடன் கூடிய பலத்த காற்று வீசத் தொடங்கியது. பிற்பகல் 1.20 மணிக்குத் தொடங்கிய இந்தத் திடீர் மழையானது, பிற்பகல் 2.00 மணி வரை சுமார் 40 நிமிடங்களுக்கு மாநகரப் பகுதிகள் முழுவதும் பரவலாக கொட்டித் தீர்த்தது.

திடீரெனப் பெய்த மழையினால் தூத்துக்குடி பழைய பேருந்து நிலையம், விவிடி சிக்னல், காய்கறி மார்க்கெட் பகுதி, டூவிபுரம், சிதம்பர நகர், பிரையண்ட் நகர் மற்றும் எட்டயபுரம் சாலை உள்ளிட்ட முக்கியச் சாலைகளில் மழைநீர் தேங்கி வெள்ளம் போல் காட்சியளித்தது. சாலையில் சென்ற வாகன ஓட்டிகள் மற்றும் பொதுமக்கள் அருகில் உள்ள வணிக வளாகக் கடைகளின் நிழற்குடைகளில் தற்காலிகமாகத் தஞ்சமடைந்தனர்.

இருப்பினும், கடந்த பல நாட்களாக நீடித்து வந்த உக்கிரமான புழுக்கமும் வெயிலும் இந்த 40 நிமிடத் தொடர் மழையினால் முற்றிலும் தணிந்து, தூத்துக்குடி மாநகரம் முழுவதும் இதமான சீசன் போன்ற குளிர்ந்த காற்று வீசத் தொடங்கியுள்ளது.