தூத்துக்குடியில் கத்தி முனையில் 15 பவுன் நகை வழக்கில் இருவருக்கு தலா 6 ஆண்டுகள் சிறை!

தூத்துக்குடி அருகே வீட்டுக்குள் நுழைந்து கத்தி முனையில் பெண்ணிடம் 15 பவுன் தங்க நகையைப் பறித்துச் சென்ற இருவருக்குத் தலா 6 ஆண்டுகள் சிறைத் தண்டனை மற்றும் தலா 5 ஆயிரம் ரூபாய் அபராதம் விதித்துத் தூத்துக்குடி நீதிமன்றம் தீர்ப்பு வழங்கியுள்ளது.

தூத்துக்குடி அருகே உள்ள புதுக்கோட்டை மத்திய, மாநில அரசு ஊழியர் குடியிருப்பில் வசித்து வருபவர் அன்னலட்சுமி (32). இவர் கடந்த 24.01.2025 அன்று தனது இல்லத்தில் தனியாக இருந்துள்ளார். அப்போது ஏரல் இடையற்காடு தளவாய்புரத்தைச் சேர்ந்த சின்னத்துரை மகன் முத்துராமன் என்கிற ரகு (38), மாயாண்டி மகன் சந்தன மகாராஜன் (வயது 24) மற்றும் வேலாயுதம் மகன் ஆனந்தராஜ் (வயது 41) ஆகிய மூவரும் ஒரு இருசக்கர வாகனத்தில் அங்கு வந்துள்ளனர்.

அவர்களில் ஆனந்தராஜ் என்பவர் எவ்வித சந்தேகமும் வராதவாறு வெளியில் பாதுகாப்புக்காக நின்றுள்ளார். அப்போது முத்துராமன் என்கிற ரகு மற்றும் சந்தன மகாராஜன் ஆகிய இருவரும் வீட்டிற்குள் அதிரடியாக நுழைந்து, தனியாக இருந்த அன்னலட்சுமியைக் கத்தி முனையில் மிரட்டி, அவரிடமிருந்த 15 பவுன் தங்க நகைகளைப் பறித்துக்கொண்டு இருசக்கர வாகனத்தில் தப்பியோடினர்.

இக்குற்றச்சம்பவம் குறித்துப் பாதிக்கப்பட்ட அன்னலட்சுமி அளித்த புகாரின் அடிப்படையில், புதுக்கோட்டை காவல் எல்லையினர் வழக்குப் பதிவு செய்து தீவிர விசாரணை நடத்தி, சம்பந்தப்பட்ட முத்துராமன், சந்தன மகாராஜன் மற்றும் ஆனந்தராஜ் ஆகிய மூவரையும் கைது செய்தனர்.

இது தொடர்பான வழக்கு விசாரணை தூத்துக்குடி 3-ஆவது குற்றவியல் நீதிமன்றத்தில் தொடர்ச்சியாக நடைபெற்று வந்தது. வழக்கின் அனைத்துத் தரப்பு விசாரணைகளும் நிறைவடைந்த நிலையில், வழக்கை விசாரித்த நடுவர் நீதிமன்ற நீதிபதி விஜய்ராஜ்குமார் குற்றச்சாட்டுகள் நிரூபிக்கப்பட்டதால் செவ்வாய்க்கிழமை அன்று இறுதித் தீர்ப்பை வழங்கினார்.

அதன்படி, முதன்மைக் குற்றவாளிகளான முத்துராமன் என்கிற ரகு மற்றும் சந்தன மகாராஜன் ஆகிய இருவருக்கும் தலா 6 ஆண்டுகள் சிறைத் தண்டனையும், தலா 5 ஆயிரம் ரூபாய் அபராதமும் விதித்து நீதிபதி உத்தரவிட்டார். மேலும், இவ்வழக்கில் வெளியில் பாதுகாப்புக்கு நின்றதாகக் குற்றம் சாட்டப்பட்ட ஆனந்தராஜ் போதிய ஆதாரங்கள் இல்லாததால் வழக்கிலிருந்து முழுமையாக விடுவிக்கப்பட்டார்.