தூத்துக்குடியில் டிஜிட்டல் பேனர்களால் விபத்து அபாயம் : மாநகராட்சி ஆணையரிடம் பாஜக நிர்வாகிகள் புகார்!

» செய்திகள் - விளையாட்டு » மாவட்ட செய்தி (தூத்துக்குடி)

தூத்துக்குடியில் டிஜிட்டல் பேனர்களால் விபத்து அபாயம் : மாநகராட்சி ஆணையரிடம் பாஜக நிர்வாகிகள் புகார்!

புதன் 13, மே 2026 5:53:33 PM (IST)

தூத்துக்குடி மாநகராட்சிக்கு உட்பட்ட பகுதிகளில் போக்குவரத்துக்கு இடையூறாகவும், விபத்து அபாயத்தை ஏற்படுத்தும் வகையிலும் வைக்கப்பட்டுள்ள டிஜிட்டல் பேனர்களை உடனடியாக அகற்றக் கோரி பாரதிய ஜனதா கட்சியினர் மாநகராட்சி ஆணையரிடம் மனு அளித்துள்ளனர்.

பாஜக தூத்துக்குடி கிழக்கு மண்டல தலைவர் ராஜேஷ் கனி தலைமையில் அளிக்கப்பட்ட மனுவில் கூறப்பட்டுள்ளதாவது: "தமிழக முதலமைச்சர் ஜோசப் விஜய் அவர்கள், பொதுமக்களுக்கு இடையூறு விளைவிக்கும் வகையில் எங்கும் டிஜிட்டல் பேனர்களோ, விளம்பர பதாகைகளோ வைக்கக் கூடாது என்று சமீபத்தில் அறிவுறுத்தியிருந்தார். ஆனால், தூத்துக்குடி மாநகராட்சியின் பல இடங்களில் இந்த நடைமுறை பின்பற்றப்படவில்லை.

மாநகராட்சியின் முக்கியச் சந்திப்புகள், சாலையோரங்கள் மற்றும் பொதுமக்கள் அதிகம் நடமாடும் பகுதிகளில் தமிழக வெற்றிக் கழகத்தின் பெயரில் வைக்கப்பட்டுள்ள பேனர்கள் போக்குவரத்தை மறைக்கும் வகையில் உள்ளதாக மனுவில் சுட்டிக்காட்டப்பட்டுள்ளது. இதனால் வாகன ஓட்டிகள் விபத்துக்குள்ளாகும் அபாயம் நிலவுவதாகவும், மக்கள் பாதுகாப்பிற்கு இவை அச்சுறுத்தலாக இருப்பதாகவும் குற்றம்சாட்டப்பட்டுள்ளது.

விதிமுறைகளை மீறி வைக்கப்பட்டுள்ள அனைத்து டிஜிட்டல் பேனர்களையும் மாநகராட்சி நிர்வாகம் தலையிட்டு உடனடியாக அகற்ற வேண்டும் என பாஜகவினர் வலியுறுத்தியுள்ளனர். இந்நிகழ்வின் போது, மண்டல துணைத் தலைவர் ஜெயரூபி, மண்டல செயலாளர் விஜயன், ஆன்மீகப் பிரிவு மாவட்ட தலைவர் ஓம் பிரபு, மாவட்ட செயலாளர் ஐயப்பன், ஊடகப்பிரிவு மாவட்ட தலைவர் ஜெயக்குமார் உள்ளிட்ட கட்சி நிர்வாகிகள் உடனிருந்தனர்.

மக்கள் கருத்து

மக்கள் பதிவு செய்யும் கருத்துகள் தணிக்கையின்றி பிரசுரமாகும் வகையில் மென்பொருள் வடிவமைக்கப்பட்டுள்ளது. தொழில்நுட்ப குறைபாடுகள் காரணமாக கருத்துக்கள் பதிவாவதில் சிறிது காலதாமதம் ஏற்பட வாய்ப்புள்ளது. வாசகர்களின் கருத்துக்களுக்கு நிர்வாகம் பொறுப்பாக மாட்டார்கள். நாகரீகமற்ற மற்றும் பிறர் மனதை புண்படுத்தகூடிய கருத்துகளை / வார்த்தைகளைப் பயன்படுத்துவதை தவிர்க்கும்படி கேட்டுக்கொள்கிறோம்.

ஆங்கிலத்தில் தட்டச்சு செய்ய Ctrl+G -ஐ அழுத்தவும்.

பெயர்: கருத்து: