2026 சட்டமன்றத் தேர்தலில் திமுக கூட்டணிக்கு ஆதரவு: புரட்சிகர இளைஞர் முன்னணி அறிவிப்பு!

நடைபெறவுள்ள 2026 தமிழ்நாடு சட்டமன்றத் தேர்தலில், திமுக தலைமையிலான கூட்டணிக்குத் தங்களது முழுமையான ஆதரவை வழங்குவதாகப் புரட்சிகர இளைஞர் முன்னணி அறிவித்துள்ளது.

2026 தமிழ்நாடு சட்டமன்றத் தேர்தலில் திமுக தலைமையிலான கூட்டணிக்குத் தனது முழு ஆதரவைத் தெரிவிப்பதாகப் புரட்சிகர இளைஞர் முன்னணி அறிவித்துள்ளது. இது தொடர்பாகத் தூத்துக்குடியில் நடைபெற்ற செய்தியாளர் சந்திப்பில், அமைப்பின் பொறுப்பாளர்கள் சுஜித், பெரியார் பித்தன், பாண்டியன் மற்றும் சீனிவாசன் ஆகியோர் கலந்துகொண்டனர்.

அப்போது, நெல்லை மாநகரப் பொறுப்பாளர் பாண்டியன் செய்தியாளர்களிடம் கூறியதாவது: "தமிழக உரிமைகளுக்கும் சமூக நீதிக்கும் எதிராகச் செயல்படும் பாஜக - அதிமுக கூட்டணியைத் தோற்கடிக்க வேண்டும். சனாதனப் பாசிசத்தைத் தடுக்கும் அரணாகவும், தமிழகத்தின் வளர்ச்சியைப் பாதுகாக்கும் சக்தியாகவும் திமுக உள்ளது. 

ஆரிய சனாதன தர்மத்திற்கு எதிரான நீண்ட போராட்ட மரபைக் கொண்டது தமிழ்நாடு. அதன் தொடர்ச்சியான திராவிட இயக்கத்தின் சமூக நீதி, மாநில உரிமை மற்றும் இந்தி எதிர்ப்பு கொள்கைகளே கடந்த 50 ஆண்டுகளில் தமிழகத்தைத் தொழில் மற்றும் மனிதவளக் குறியீட்டில் முதன்மை மாநிலமாக மாற்றியுள்ளன. குறிப்பாக, கடந்த ஐந்து ஆண்டுகளில் ஒன்றிய அரசின் பல்வேறு நெருக்கடிகளையும் தாண்டி திமுக ஆட்சியில் தமிழகம் முன்னேறி வருகிறது.

எனவே, திமுக மற்றும் அதன் கூட்டணிக் கட்சி வேட்பாளர்களுக்கு வாக்களிக்கக் கோரி மாநிலம் முழுவதும் பரப்புரை செய்வோம். ஸ்டெர்லைட் துப்பாக்கிச் சூடு விவகாரத்தில், சம்பந்தப்பட்ட அதிகாரிகள் மீது நடவடிக்கை எடுக்க வரும் திமுக ஆட்சியில் தொடர்ந்து அழுத்தம் கொடுப்போம்," என்று அவர் தெரிவித்தார்.