தூத்துக்குடி வ.உ.சிதம்பரனார் துறைமுகத்தில் 55-வது பாதுகாப்பு வார விழா நிறைவு

தூத்துக்குடி வ.உ.சிதம்பரனார் துறைமுக ஆணையத்தில் கடந்த மார்ச் 4-ம் தேதி தொடங்கி நடைபெற்று வந்த 55-வது பாதுகாப்பு வார விழாவின் நிறைவு விழா நேற்று (13.03.2026) சிறப்பாக நடைபெற்றது.

நிகழ்ச்சிக்குத் தலைமை வகித்து உரையாற்றிய துறைமுக ஆணையத் தலைவர் ஷாந்த குமார் புரோஹித், "வ.உ.சிதம்பரனார் துறைமுகம் ஒரு வலுவான பாதுகாப்புக் கலாச்சாரத்தை உருவாக்குவதிலும், விழிப்புணர்வை மேம்படுத்துவதிலும், அனைத்துத் தரப்பினரின் நலனை உறுதி செய்வதிலும் உறுதியாக உள்ளது. இது துறைமுகச் சூழலில் பாதுகாப்பான மற்றும் பொறுப்பான பணிச்சூழலை மேம்படுத்தும்," என்று தெரிவித்தார்.

விழாவின் ஒரு பகுதியாகப் பாதுகாப்பு விழிப்புணர்வுச் சுவரொட்டிகளைத் துறைமுகத் தலைவர் வெளியிட்டார். பாதுகாப்பை மேம்படுத்த மக்களை ஈடுபடுத்துதல், கல்வி புகட்டுதல் மற்றும் அதிகாரப்படுத்துதல்' எனும் தலைப்பில் பள்ளி, கல்லூரி மாணவர்கள், துறைமுக ஊழியர்கள் மற்றும் பயனாளர்களுக்குக் கட்டுரை, ஓவியம் மற்றும் வாசகம் எழுதும் போட்டிகள் நடத்தப்பட்டன. இதில் வெற்றி பெற்றவர்களுக்குப் பரிசுகள் வழங்கப்பட்டன.

இந்நிகழ்ச்சியில் தலைமைத் தற்காப்பு அதிகாரி பி. கவின் மகராஜ், போக்குவரத்து மேலாளர்  விமல் பார்கவன், உதவி இயக்குநர் மற்றும் டாக் பாதுகாப்பு அதிகாரி  ஞானசுந்தரம் மற்றும் துறைத் தலைவர்கள் கலந்துகொண்டனர்.

உதவி இயக்குநர் ஞானசுந்தரம் பேசுகையில், "துறைமுகத்தின் சரக்கு கையாளும் திறன் மற்றும் வெளியேற்றும் வசதிகள் மேம்படுத்தப்பட்டுள்ள அதே வேளையில், பாதுகாப்பான மற்றும் திறமையான செயல்பாடுகளை உறுதி செய்யப் பாதுகாப்பு நடவடிக்கைகளும் இணையாக வலுப்படுத்தப்பட்டுள்ளன," என்றார்.

 மார்ச் 4-ம் தேதி பாதுகாப்பு ஊர்வலம், கொடியேற்றம் மற்றும் பாதுகாப்பு உறுதிமொழி ஏற்புடன் விழா தொடங்கியது. துறைமுகத் தலைவர் பாதுகாப்பு கொடியினை ஏற்றி வைத்தார். ஓட்டுநர்கள் மற்றும் இயந்திர இயக்குபவர்களுக்காகப் பாதுகாப்பான ஓட்டுதல் மற்றும் விபத்துத் தடுப்பு குறித்த ஒரு நாள் விழிப்புணர்வு பயிற்சி வழங்கப்பட்டது.

பள்ளி மற்றும் கல்லூரி மாணவர்களின் (RSP) பங்களிப்புடன் சாலை பாதுகாப்பு பிரச்சாரம் மேற்கொள்ளப்பட்டது. இதில் கனரக வாகனங்களின் முகப்பு விளக்குகளில் கறுப்புப் புள்ளிகள் மற்றும் பிரதிபலிப்பு ஸ்டிக்கர்கள் ஒட்டப்பட்டன.

மார்ச் 12-ம் தேதி தொழில்சார் ஆரோக்கியப் பட்டறை மற்றும் விழிப்புணர்வு முகாம் நடைபெற்றது. இதில் முதலுதவி, நோய் தடுப்பு முறைகள் குறித்த அமர்வுகளுடன், ஊழியர்கள் மற்றும் மாணவர்களுக்கான இலவச மருத்துவப் பரிசோதனையும் நடைபெற்றது.

இவ்விழா துறைமுக அதிகாரிகள், ஊழியர்கள், மாணவர்கள் மற்றும் பயனாளிகளிடையே பாதுகாப்பு குறித்த விழிப்புணர்வையும் கூட்டுப் பொறுப்பையும் வெற்றிகரமாக ஏற்படுத்தியது என்று துறைமுக ஆணையம் வெளியிட்டுள்ள செய்திக் குறிப்பில் தெரிவிக்கப்பட்டுள்ளது.