திருச்செந்தூர் அவதார பதியில் அய்யா வைகுண்டரின் 194-வது அவதார தின விழா கோலாகலம்!

திருச்செந்தூர் அருள்மிகு சுப்பிரமணிய சுவாமி கோயில் கடற்கரை பகுதியில் அமைந்துள்ள அய்யா வைகுண்டர் அவதார பதியில், அய்யாவின் 194-வது அவதார தின விழா பல்வேறு சிறப்பு வழிபாடுகளுடன் மிகவும் விமரிசையாக நடைபெற்றது.

விழாவின் முதல் நாளான செவ்வாய்க்கிழமை அதிகாலை முதல் சிறப்புப் பணிவிடைகள் தொடங்கின. உகப்படிப்பு மற்றும் காலை நேர அன்னதர்மம் நடைபெற்றது. நண்பகலில் உச்சிபடிப்பு பணிவிடைக்குப் பிறகு, மாலையில் அய்யா புஷ்ப வாகனத்தில் பவனியாக வந்து பக்தர்களுக்கு அருள்பாலித்தார்.

தொடர்ந்து திருஏடு வாசிப்பு, சிறுவர்-சிறுமியரின் கலை நிகழ்ச்சிகள் மற்றும் பேச்சுப் போட்டிகள் நடைபெற்றன. இரவு சிவச்சந்திரன் குழுவினரின் இன்னிசை நிகழ்ச்சியும் இடம்பெற்றது.

முக்கிய நிகழ்வான நேற்று புதன்கிழமை அதிகாலை முதலே வழிபாடுகள் களைகட்டின. அதிகாலை தாலாட்டு பாடுதல் மற்றும் பள்ளி உணர்த்தல் நிகழ்ச்சிகள் நடைபெற்றன. சூரிய உதயத்தின் போது, பக்தர்கள் திரளாகச் சூழ்ந்து நிற்க, கடல் பதமிட்டு சூரிய பிரகாச சுத்த அய்யா வைகுண்டரை அவதார பதிக்கு அழைத்து வரும் வைபவம் நடைபெற்றது. பின்னர் அய்யாவுக்குச் சிறப்புப் பணிவிடைகள் செய்யப்பட்டு, பக்தர்களுக்கு இனிமம் மற்றும் அன்னதர்மம் வழங்கப்பட்டது.

விழாவில் நெல்லை, தூத்துக்குடி மற்றும் கன்னியாகுமரி மாவட்டங்களில் இருந்து ஆயிரக்கணக்கான அய்யாவழி பக்தர்கள் வருகை தந்து வழிபாடு நடத்தினர். விழாவிற்கான விரிவான ஏற்பாடுகளை அய்யாவழி அகில திருக்குடும்ப மக்கள் சபை தலைவர் வள்ளியூர் எஸ். தர்மர், செயலாளர் பொன்னுதுரை, பொருளாளர் கோபால் மற்றும் நிர்வாகக் குழு உறுப்பினர்கள் சிறப்பாகச் செய்திருந்தனர்.