தூய்மை பணியாளர் தற்கொலை: பாஸ்போர்ட்டை ஒப்படைக்க கோரிய முன்னாள் பேரூராட்சி தலைவியின் மனு தள்ளுபடி!

உடன்குடியில் தூய்மை பணியாளர் சுடலை மாடன் தற்கொலை வழக்கில் முன்னாள் பேரூராட்சி தலைவி ஆயிஷா கல்லாசியின் பாஸ்போர்ட்டை ஒப்படைக்க கோரிய மனுவை நீதிமன்றம் தள்ளுபடி செய்தது. 

தூத்துக்குடி மாவட்டம், உடன்குடி தேர்வு நிலை பேரூராட்சியில் தூய்மை பணியாளராக வேலை பார்த்து மேற்பார்வையாளராக பதவி உயர்வு பெற்றவர் சுடலை மாடன் (56). இவரை பணிநிரந்தரம் செய்ய பேரூராட்சியின் முன்னாள் தலைவி ஆயிஷா கல்லாசி, செயல் அலுவலர் பாபு ஆகியோர் பணம் கேட்டு மிரட்டியதாகவும், அவதூறாக பேசியதாகவும் கூறி கடந்த 2023ஆம் ஆண்டு சுடலைமாடன் விஷம் குடித்து தற்கொலை செய்து கொண்டார். 

இதுகுறித்து அவரது மனைவி தங்கம்மாள் கொடுத்த புகாரின் பேரில் பேரூராட்சியின் முன்னாள் தலைவி ஆயிஷா கல்லாசி, முன்னாள் செயல் அலுவலர் பாபு, தற்போதைய பேரூராட்சி தலைவர் ஹிமைரா ரமீஸ் பாத்திமா, பேரூராட்சி தலைவரின் கணவர் வார்டு கவுன்சிலர் அசாப் அலி பாதுஷா மற்றும் 3 நபர்கள் மீது மீது தீண்டாமை வன்கொடுமை தடுப்புச் சட்டம் உள்ளிட்ட பிரிவுகளில் வழக்குப்பதிவு செய்யப்பட்டு தூத்துக்குடி மாவட்ட பிசிஆர் நீதிமன்றத்தில் வழக்கு நடந்து வருகிறது.

அந்த வழக்கில் திருப்பமாக முன்னாள் உடன்குடி பேரூராட்சி தலைவர் ஆயிஷா கல்லாசி என்பவர் ஜாமீன் பெறும் போது ஒப்படைத்த தனது பாஸ்போர்ட்டை வெளிநாடு செல்வதற்காக திரும்ப கொடுக்க கோரி கடந்த பிப்ரவரி 6ம் தேதி தூத்துக்குடி மாவட்ட பிசிஆர் நீதிமன்றத்தில் மனு தாக்கல் செய்திருந்தார். 

இந்த மனு 9ஆம் தேதி விசாரணைக்கு வந்தபோது நீதிபதி, அவர் கூறிய காரணங்களை ஏற்றுக் கொள்ள முடியாது, பாஸ்போர்ட்டை திரும்ப கொடுத்தால் தலைமறைவாக வாய்ப்புள்ளதால் வழக்கின் விசாரணையை பாதிக்கும், பாஸ்போர்ட்டை திரும்ப கொடுக்க முடியாது என்று ஆயிஷா கல்லாசி தாக்கல் செய்த மனுவை தள்ளுபடி செய்தார்.