குழந்தை இல்லாத ஏக்கத்தில் பெண் தற்கொலை: தூத்துக்குடியில் பரிதாபம்!

தூத்துக்குடியில் குழந்தை இல்லாத ஏக்கத்தில் பெண் தூக்கிட்டுத் தற்கொலை செய்து கொண்ட சம்பவம் பெரும் சோகத்தை ஏற்படுத்தியுள்ளது.

தூத்துக்குடி முத்தையாபுரம் அய்யன் கோவில் தெருவைச் சேர்ந்தவர் மணி. இவரது மனைவி முத்து இசக்கி (42). இந்தத் தம்பதிக்குத் திருமணமாகி 26 ஆண்டுகள் ஆகியும் குழந்தைகள் இல்லை. இதனால் முத்து இசக்கி கடந்த சில மாதங்களாக மிகுந்த மன வருத்தத்தில் இருந்து வந்துள்ளார். அவரது கணவர் மணி அவருக்குப் பல்வேறு ஆறுதல்களைக் கூறி தேற்றி வந்த நிலையில், வாழ்க்கையில் விரக்தியடைந்த முத்து இசக்கி நேற்று இரவு தனது வீட்டில் தூக்கிட்டுத் தற்கொலை செய்து கொண்டார்.

இது குறித்துத் தகவலறிந்த முத்தையாபுரம் காவல் நிலைய ஆய்வாளர் கிங்ஸ்லி தேவானந்த், சம்பவ இடத்திற்கு சென்று உடலைக் கைப்பற்றிப் பிரேதப் பரிசோதனைக்காக அனுப்பி வைத்தார். மேலும், இச்சம்பவம் குறித்து வழக்குப் பதிவு செய்து காவல்துறையினர் விசாரணை நடத்தி வருகின்றனர்.