தூத்துக்குடியில் வருவாய்த்துறையினர் சாலை மறியல் : 3 தாசில்தார்கள் உட்பட 122பேர் கைது!

தூத்துக்குடியில் 9 அம்ச கோரிக்கைகளை நிறைவேற்ற வலியுறுத்தி, சாலை மறியலில் ஈடுபட்ட 3 தாசில்தார்கள் உட்பட நூறுக்கும் மேற்பட்டோரை போலீசார் கைது செய்தனர்

தூத்துக்குடியில் 9 அம்ச கோரிக்கைகளை உடனடியாக நிறைவேற்ற வலியுறுத்தி, தமிழக வருவாய்த்துறை அலுவலர் சங்கங்களின் கூட்டமைப்பு சார்பில் சாலை மறியல் போராட்டம் நடைபெற்றது. இந்த மறியல் போராட்டத்திற்குத் தாசில்தார்கள் ஞானராஜ், செல்வகுமார், சாமிநாதன் மற்றும் வருவாய்த்துறை அதிகாரிகள் பாலமுருகன், காளிராஜ், சந்திரசேகர், குமாரலிங்கம் ஆகியோர் தலைமை தாங்கினர். முன்னாள் மாநிலத் துணைத் தலைவர் முருகன் போராட்டத்தைத் தொடங்கி வைத்தார்.

முன்னாள் மாநிலத் துணைப் பொதுச் செயலாளர் வெங்கடேசன், ஊரக வளர்ச்சித்துறை அன்புச்செல்வம், தமிழ்நாடு அரசு ஊழியர் சங்க மாவட்டத் தலைவர் மகேந்திர பிரபு, சத்துணவு ஊழியர் சங்கத் தலைவர் ஜெயபாக்கியம், உள்ளிட்ட மாவட்டம் முழுவதிலுமிருந்து திரளான அரசு ஊழியர்கள் கலந்துகொண்டனர்.

அரசு ஊழியர்கள் அனைவரும் பேரணியாகப் புறப்பட்டு, பெரியார் சிலை முன்பாகச் சாலையில் அமர்ந்து மறியலில் ஈடுபட்டனர். இதையடுத்து மறியலில் ஈடுபட்ட 32 பெண்கள் உட்பட 90 பேரை மத்திய பாகம் காவல் நிலைய ஆய்வாளர் மோகன் ஐயர் தலைமையிலான போலீசார் கைது செய்து, தனியார் திருமண மண்டபத்தில் தங்க வைத்தனர்.

இந்தத் தொடர் போராட்டத்தின் காரணமாக தூத்துக்குடி - பாளையங்கோட்டை சாலையில் சுமார் 15 நிமிடங்கள் போக்குவரத்து பாதிக்கப்பட்டது. மாவட்ட ஆட்சியர் அலுவலகம் உள்ளிட்ட முக்கிய அரசு அலுவலகப் பணிகள் இன்று ஓரளவிற்குப் பாதிக்கப்பட்டன.