தமிழ் மாநில காங்கிரஸ் வேட்பாளர் எஸ்டிஆர் விஜய் சீலன் வேட்புமனு தாக்கல்!!

தூத்துக்குடியில் தமிழ் மாநில காங்கிரஸ் வேட்பாளர் எஸ்டிஆர் விஜய் சீலன் வேட்புமனு தாக்கல் செய்தார். 

மக்களவைத் தேர்தலில், பாஜக கூட்டணி சார்பில் போட்டியிடும் தமிழ் மாநில காங்கிரஸ் கட்சியின் தூத்துக்குடி வேட்பாளராக எஸ்.டி.ஆர். விஜயசீலன் அறிவிக்கப்பட்டுள்ளார். அவர் இன்று தூத்துக்குடி மாவட்ட ஆட்சியர் அலுவலகத்தில் தூத்துக்குடி பாராளுமன்ற தேர்தல் நடத்தும் அலுவலர்/ மாவட்ட ஆட்சித் தலைவர் கோ.லட்சுமிபதியிடம் தனது வேட்புமனுவை தாக்கல் செய்தார். மாற்று வேட்பாளராக அவரது துணைவியார் ரீணா சீலன் வேட்பு மனு தாக்கல் செய்தார்.

பாஜக மாவட்ட தலைவர்கள் சித்ராங்கதன், வெங்கடேசன் சென்னக்கேசவன், தமிழக மக்கள் முன்னேற்றக் கழக மாநகர செயலாளர் சலீம், அமமுக மாநகர மாவட்ட செயலாளர் பிரைட்டர், ஓபிஎஸ் அணி மாநகர மாவட்ட செயலாளர் ஏசாதுரை ஆகியோர் முன்னிலையில் வேட்பு மனுவை தாக்கல் செய்தார். முன்னதாக அவர் தூத்துக்குடி குரூஸ் பர்னாந்து திருவுருவ சிலைக்கு மாலை அணிவித்துவிட்டு அங்கிருந்து ஊர்வலமாக புறப்பட்டார். அப்போது அவர் தனது கட்சியின் சின்னமான சைக்கிளை ஓட்டிக்கொண்டு வந்தார். 

மேலும், பெரியார் அம்பேத்கர், முத்து ராமலிங்க தேவர் ஆகியோர் திரு உருவச்சலைக்கு மாலை அணிவித்து மரியாதை செலுத்தினார். பின்னர் செய்தியாளரிடம் கூறுகையில், பிரதமர் நரேந்திர மோடி தலைமையில் மீண்டும் மூன்றாவது முறையாக பாஜக ஆட்சி அமைக்கும். தூத்துக்குடியில் தமாகா வெற்றி வாய்ப்பு பிரகாசமாக உள்ளது. எதிர்த்து நிற்கும் வேட்பாளர்கள் டெபாசிட் இழக்கும் நிலை ஏற்படும். கடந்த டிசம்பர் மாதம் ஏற்பட்ட மழை வெள்ள பாதிப்பின்போது, முதல் 3 நாள்கள் மக்களுக்கு திமுக அரசு எதுவும் செய்யவில்லை. 

மேலும், கடந்த 5 ஆண்டுகளில் மக்களவை உறுப்பினராக இருந்த கனிமொழி புதிதாக எந்த திட்டங்களையும் தூத்துக்குடிக்குக் கொண்டு வரவில்லை. நான் வெற்றி பெற்றால், தொழில் நகரமான தூத்துக்குடியில் உள்ள இளைஞர்களுக்கு வேலை வாய்ப்பு அதிகரிக்கும் வகையில் சிறந்த நிறுவனங்களைக் கொண்டுவருவேன். மக்களின் நலனுக்காகப் பாடுபடுவேன் என்றார்.