பள்ளி நிர்வாகத்தை கண்டித்து பெற்றோர்கள் திடீர் மறியல் போராட்டம்: தூத்துக்குடியில் பரபரப்பு!!

தூத்துக்குடியில் பள்ளி நிர்வாகத்தை கண்டித்து மாணவர்களின்  பெற்றோர்கள் திடீர் மறியல் போராட்டம் நடத்தியதால் பரபரப்பு ஏற்பட்டது. 

தூத்துக்குடியில் பாளைங்கோட்டை மெயின் ரோட்டில் மறவன் மடம் பகுதியில் அமிர்தா வித்யாலயம் பள்ளி இயங்கி வருகிறது. இந்த பள்ளியில் படிக்கும் குழந்தைகளை பெற்றோர்கள் தங்களது வாகனத்தில் அழைத்து வந்து பள்ளி வளாகத்தில் விட்டுச் செல்வது வழக்கம். இந்நிலையில், தற்போது தலைமை ஆசிரியர் செந்தில்குமார் என்பவர் பள்ளி வளாகத்திற்குள் பெற்றோர்களின் வாகனம் வரக்கூடாது என்று அறிவிப்பு வெளியிட்டுள்ளார்.

இதனால் பெற்றோர்கள் அதிர்ச்சியடைந்தனர். மெயின் ரோட்டில் வாகனத்தை நிறுத்திவிட்டு குழந்தைகளை அழைத்துச் சென்றால் விபத்து அபாயம் ஏற்படும் என்று பள்ளி நிர்வாகத்திடம் கோரிக்கை விடுத்துள்ளனர். ஆனால் பள்ளி நிர்வாகம் பெற்றோர்களின் கோரிக்கையை ஏற்கவில்லை என்று கூறப்படுகிறது. இதையடுத்து பெற்றோர்கள் இன்று காலை தூத்துக்குடி - பாளை., தேசிய நெடுஞ்சாலையில் இருபுறமும் அமர்ந்து திடீர் சாலை மறியல் போராட்டத்தில் ஈடுபட்டனர். 

இதனால் சுமார் 1 மணி நேரம் அங்கு போக்குவரத்து பாதிக்கப்பட்டு பரபரப்பு நிலவியது. இதுகுறித்து தகவல் அறிந்து வந்த தூத்துக்குடி ரூரல் டிஎஸ்பி சுரேஷ், புதுக்கோட்டை இன்ஸ்பெக்டர் அன்பரசி,  கிராம நிர்வாக அதிகாரி பிரேமலதா ஆகியோர் மறியலில் ஈடுபட்டவர்களிடம் பேச்சுவார்த்தை நடத்தினர். மேலும் பள்ளி நிர்வாகத்திடம் பேசி நடவடிக்கை எடுப்பதாக உறுதியளித்தனர். இதையடுத்து மறியல் போராட்டம் கைவிடப்பட்டது. இந்த சம்பவம் தூத்துக்குடியில் பரபரப்பை ஏற்படுத்தியது.