நிச்சயமற்ற சர்வதேச சூழலில் இந்தியாவுடன் ஒத்துழைப்பு மிக முக்கியம்: ஜப்பான் பிரதமர் பேட்டி!

நிச்சயமற்ற சர்வதேச சூழலில் இந்தியாவுடன் ஒத்துழைப்பு  மிக முக்கியம் என்று  ஜப்பான் பிரதமர் சனே தகாய்ச்சி கூறினார்.

பிரதமர் நரேந்திர மோடியின் அதிகாரப்பூர்வ அழைப்பின் பேரில், ஜப்பான் பிரதமர் சனே தகாய்ச்சி விரைவில் இந்தியாவிற்கு அரசுமுறைப் பயணம் மேற்கொள்ளவுள்ளார். இப்பயணத்திற்கு முன்னோடியாக டோக்கியோவில் செய்தியாளர்களைச் சந்தித்த அவர், தற்போதைய உலகளாவிய நிலப்பரப்பில் இரு நாடுகளுக்கு இடையிலான நட்புறவின் அவசியத்தை விரிவாக எடுத்துரைத்தார்.

செய்தியாளர் சந்திப்பில் பேசிய ஜப்பான் பிரதமர் சனே தகாய்ச்சி, "சர்வதேச சூழலில் உலகளாவிய நிச்சயமற்ற தன்மை அதிகரித்து வரும் நிலையில், ஒரே மாதிரியான அடிப்படை விழுமியங்களையும் பரஸ்பர நட்புறவின் நலன்களையும் பகிர்ந்துகொள்ளும் இந்தியாவுடனான உத்தியோகபூர்வ ஒத்துழைப்பின் முக்கியத்துவம் மேலும் அதிகரித்துள்ளது. தற்போதைய சர்வதேச நிலையை கருத்தில் கொண்டு பிரதமர் மோடியுடன் உறுதியான கூட்டாண்மையை முன்னெடுக்கத் திட்டமிட்டுள்ளேன்" என்று குறிப்பிட்டார்.

மேலும், ஜப்பான் - இந்தியா இடையிலான இருதரப்பு உறவை வலுப்படுத்துதல், பொருளாதாரப் பாதுகாப்பில் கூட்டு ஒத்துழைப்பை ஊக்குவித்தல், மற்றும் முதலீடு - புத்தாக்கங்களை நோக்கி இரு நாட்டு நிறுவனங்களுக்கு இடையே பரஸ்பர வணிகத்தை வளர்த்தல் ஆகிய மூன்று முக்கிய அம்சங்களை மையமாகக் கொண்டே தனது இந்தியப் பயணம் அமையவுள்ளதாக அவர் விளக்கினார்.

இப்பயணத்தின் ஒரு பகுதியாக, ஜப்பானிய வணிகச் சமூகத்தைச் சேர்ந்த 150-க்கும் மேற்பட்ட முக்கியப் பிரமுகர்களின் பங்கேற்புடன் 'ஜப்பான் - இந்தியா பொருளாதார மன்றம்' நடத்தத் திட்டமிடப்பட்டுள்ளது. இதன் மூலம் அரசு மற்றும் தனியார் துறைகளை ஒன்றிணைத்து, இரு நாடுகளுக்கு இடையிலான பொருளாதார வரம்பை விரிவுபடுத்தவும், வலுவான நிதி உள்கட்டமைப்பை உருவாக்கவும் நடவடிக்கை எடுக்கப்படும் எனத் தெரிவிக்கப்பட்டுள்ளது.

ஆசியாவின் முதன்மை ஜனநாயக நாடுகளில் ஒன்றான இந்தியா, ஜப்பானைப் போலவே இந்தோ - பசிபிக் பிராந்தியத்தில் அமைதி மற்றும் ஸ்திரத்தன்மையை நிலைநாட்டுவதில் பெரும் பொறுப்பு வகிக்கிறது என்று சுட்டிக்காட்டிய ஜப்பான் பிரதமர், குவாட் (Quad) கூட்டமைப்பை (ஜப்பான், அமெரிக்கா, ஆஸ்திரேலியா, இந்தியா) உள்ளடக்கிய 'சுதந்திரமான மற்றும் திறந்த இந்தோ - பசிபிக்' என்ற கூட்டு நோக்கத்தை நனவாக்குவது குறித்துப் பிரதமர் மோடியுடன் விரிவாக விவாதிக்க உள்ளதாகக் கூறினார். இப் பயணமானது பிரதமர் மோடியுடனான தனிப்பட்ட நம்பிக்கையின் அடிப்படையிலான உறவை மேலும் அடுத்த கட்டத்திற்கு எடுத்துச் செல்லும் என்றும் அவர் நம்பிக்கை தெரிவித்துள்ளார்.