அமெரிக்கா, தென்கொரியா கூட்டு ராணுவப் பயிற்சி: பதிலடி கொடுத்த வடகொரியா!

உலக நாடுகளின் கடும் எதிர்ப்பையும் மீறி, வடகொரியா நேற்று ஒரே நாளில் கிழக்கு கடற்கரைப் பகுதியை நோக்கி 10 ஏவுகணைகளை ஏவி தனது பலத்தை நிரூபித்துள்ளது.

தலைநகர் பியாங்யாங்கில் உள்ள சர்வதேச விமான நிலையப் பகுதியிலிருந்து நேற்று மதியம் 10-க்கும் மேற்பட்ட ஏவுகணைகள் வரிசையாக ஏவப்பட்டன. இவை சுமார் 350 கி.மீ. (220 மைல்) தூரம் பாய்ந்து சென்று ஜப்பானின் பிரத்யேக பொருளாதார மண்டலத்திற்கு வெளியே கடலில் விழுந்தன. இந்த சோதனையால் கப்பல்களுக்கோ அல்லது விமானங்களுக்கோ எந்த பாதிப்பும் ஏற்படவில்லை என்று ஜப்பான் பாதுகாப்புத் துறை அமைச்சர் ஷின்ஜிரோ கொய்சுமி உறுதிப்படுத்தியுள்ளார்.

அமெரிக்காவும் தென்கொரியாவும் இணைந்து தற்போது பிரமாண்டமான வருடாந்திர கூட்டு ராணுவப் பயிற்சியை மேற்கொண்டு வருகின்றன. இதில் நூற்றுக்கணக்கான போர் விமானங்கள், பீரங்கிகள் மற்றும் சுமார் 28,500 அமெரிக்க வீரர்கள் பங்கேற்றுள்ளனர். இந்தப் பயிற்சியைத் தங்களுக்கு எதிரான "ஆக்கிரமிப்பு ஒத்திகை" என்று கருதும் வடகொரியா, அதற்குப் பதிலடி கொடுக்கும் விதமாகவே இந்தச் சோதனையை நடத்தியுள்ளது.

ஒருபுறம் பதற்றம் நிலவினாலும், அமெரிக்க அதிபர் டிரம்ப், வடகொரிய அதிபர் கிம் ஜாங் அன்னுடன் மீண்டும் பேச்சுவார்த்தை நடத்த ஆர்வமாக இருப்பதாகத் தகவல்கள் தெரிவிக்கின்றன. சமீபத்தில் தென்கொரிய பிரதமர் கிம் மின்-சியோக் வாஷிங்டனில் டிரம்பைச் சந்தித்து இது குறித்து ஆலோசனை நடத்தியுள்ளார். ஆனால், வடகொரியாவின் இந்தத் தொடர் ஏவுகணை சோதனைகள் பேச்சுவார்த்தை முயற்சிக்கு முட்டுக்கட்டையாக அமையலாம் என்று அஞ்சப்படுகிறது.

கடந்த 2006-ஆம் ஆண்டு முதல் ஐநா சபையின் பல்வேறு தடைகளுக்கு மத்தியிலும், அணு ஆயுத பலத்தைப் பெருக்கிக் கொள்வதில் வடகொரியா பிடிவாதமாக இருந்து வருகிறது. நேற்றைய இந்தச் செயல் ஆசிய பிராந்தியத்தில் மீண்டும் போர் பதற்றத்தை அதிகரித்துள்ளது.