அமெரிக்காவுக்கு வடகொரியா பகிரங்க மிரட்டல்: ஏவுகணை சோதனையைப் பார்வையிட்டார் கிம்!

அமெரிக்கா மற்றும் தென்கொரியாவின் கூட்டு ராணுவப் பயிற்சிக்குப் பதிலடி கொடுக்கும் வகையில், வடகொரிய அதிபர் கிம் ஜாங் அன் தனது மகளுடன் இணைந்து பிரம்மாண்ட ஏவுகணை சோதனையைப் பார்வையிட்டார்.

அமெரிக்கா மற்றும் தென்கொரிய நாடுகள் இணைந்து நடத்தி வரும் கூட்டு ராணுவப் பயிற்சிக்குத் தனது எதிர்ப்பைத் தெரிவிக்கும் வகையில், வடகொரியா மீண்டும் ஏவுகணை சோதனைகளைத் தீவிரப்படுத்தியுள்ளது. வடகொரியாவின் மேற்கு கடற்கரைப் பகுதியில் உள்ள தீவுகளை இலக்காகக் கொண்டு, ‘சோ ஹியோன்’ (So-hyon) என்ற அதிநவீன போர்க்கப்பலில் இருந்து நேற்று குரூஸ் ஏவுகணைகள் ஏவப்பட்டன. இந்த ஏவுகணைகள் கடலில் உள்ள இலக்குகளைத் துல்லியமாகத் தாக்கி அழித்தன.

இந்த ஏவுகணை சோதனையை வடகொரிய அதிபர் கிம் ஜாங் அன், தனது 13 வயது மகள் கிம் ஜு ஏ (Kim Ju-ae) உடன் நேரில் வந்து பார்வையிட்டார். கட்டுப்பாட்டு அறையில் அமர்ந்து, ஏவுகணைகள் பாய்வதையும் அவை இலக்குகளைத் தாக்குவதையும் தனது மகளுக்கு அவர் விளக்கிக் கூறினார். சமீபகாலமாகத் தனது மகளைத் தொடர்ந்து ராணுவ நிகழ்வுகளுக்கு அழைத்து வருவதால், அவரே வடகொரியாவின் அடுத்த வாரிசு என்பது உறுதியாகி வருவதாக அரசியல் நோக்கர்கள் கருதுகின்றனர்.

சோதனைக்குப் பிறகு பேசிய கிம் ஜாங் அன் தெரிவித்ததாவது: "நமது நாடு எப்போதும் வலிமையான மற்றும் நம்பகமான அணுஆயுதத் தற்காப்புத் திறனைப் பெற்றிருக்க வேண்டும். எதிரிகளின் எந்தவொரு அச்சுறுத்தலையும் முறியடிக்க நமது கடற்படை தயாராக இருப்பதை இந்தச் சோதனை நிரூபித்துள்ளது."

அமெரிக்கா மற்றும் தென்கொரியா நாடுகள் ‘ப்ரீடம் ஷீல்ட்’ (Freedom Shield) என்ற 11 நாள் கூட்டு ராணுவப் பயிற்சியைத் தொடங்கியுள்ளன. இதனைத் தங்களுக்கு எதிரான படையெடுப்பு ஒத்திகை என வடகொரியா கருதுகிறது. இதற்கிடையே, கிம் ஜாங் அன்னின் சகோதரி கிம் யோ ஜாங் விடுத்துள்ள அறிக்கையில், "எதிரிகள் எங்கள் வலிமையை விரைவில் உணர்வார்கள்" என எச்சரித்துள்ளார். இதனால் கொரிய தீபகற்பத்தில் மீண்டும் போர் பதற்றம் அதிகரித்துள்ளது.